လူမှုဆက်ဆံရေးမှာ ဖြစ်လေ့ဖြစ်ထရှိတဲ့ ပွတ်တိုက်မှုတွေကို ဘယ်လိုလျှော့ချမလဲ

လူမှုဆက်ဆံရေးမှာ ဖြစ်လေ့ဖြစ်ထရှိတဲ့ ပွတ်တိုက်မှုတွေကို ဘယ်လိုလျှော့ချမလဲ။

လူဆိုတာ ခံစားချက်ရှိတဲ့ သတ္တဝါပဲဖြစ်တာမို့ တစ်ဦးနဲ့တစ်ဦး ဆက်ဆံ‌ပြောဆို နေထိုင်ရတဲ့အခါ မိသားစု၊ အလုပ်ခွင်၊ မိတ်ဆွေ စတဲ့ ဘယ်နေရာမှာပဲဖြစ်ဖြစ် ပွတ်တိုက်မှု (Conflict) ဆိုတာမျိုးက အနည်းနဲ့အများတော့ ရှိစမြဲပါ။

စိတ်ခံစားချက်တွေ ရှိနေသရွေ့ အဖုအထစ်တွေ ဖြစ်ပေါ်နိုင်တာ သဘာဝပါပဲ။

ဒီပွတ်တိုက်မှုတွေကို လျော့နည်းအောင်လုပ်ဖို့၊ တစ်ဦးနဲ့တစ်ဦး မထိခိုက်အောင် ဖြေရှင်းနိုင်ဖို့အတွက်ဆိုရင် EQ ဆိုတဲ့ (Emotional Quotient) စိတ်ခံစားမှု ဉာဏ်ရည်/စွမ်းရည် ကောင်းမွန်ဖို့က အဓိကကျပါတယ်။

ဒီနေ့ခေတ်မှာ IQ (ဉာဏ်ရည်) အပြင် EQ ကိုပါ တော်တော်လေး အလေးထားလာကြတာ တွေ့ရပါတယ်။

EQ ကောင်းတဲ့သူတွေမှာ ဒီလိုပွတ်တိုက်မှုတွေကို လျှော့ချနိုင်တဲ့ အတွေးအခေါ်နဲ့ အပြုအမူတွေရှိကြပါတယ်။

🌟 EQ ကောင်းတဲ့သူတွေ/ EQ မြင့်တဲ့သူတွေမှာ အဓိက စွမ်းရည် (၄) မျိုးကို တွေ့ရတတ်ပါတယ်။

၁။ ကိုယ့်ကိုယ်ကို သိရှိနားလည်နိုင်စွမ်း (Self-awareness)

• ကိုယ့်စိတ်ကိုယ် သိခြင်း
  ကိုယ်ဟာ ဘယ်လိုအချိန်မှာ စိတ်တိုတတ်လဲ၊ ဘာကို မကြိုက်ဘူးလဲ၊ ကိုယ့်ရဲ့ အားသာချက်/အားနည်းချက်တွေက ဘာတွေလဲဆိုတာကို တိတိကျကျ သိတယ်။
• ခံစားချက်ကို အသိအမှတ်ပြုခြင်း
  ဒေါသထွက်လာပြီဆိုရင် “ ငါဒေါသထွက်နေပြီ” လို့ ကိုယ့်ကိုယ်ကိုယ် သတိထားမိတယ်။ အဲဒီ ခံစားချက်ကို လက်ခံတယ်။
  .

၂။ ကိုယ့်ကိုယ်ကိုယ် ထိန်းချုပ်စီမံနိုင်စွမ်း (Self-management)

• ခံစားချက်ကို ထိန်းကျောင်းခြင်း
  ဒေါသထွက်လာရင် ချက်ချင်း မတုံ့ပြန်ဘဲ ခဏရပ်ပြီး ကိုယ့်ခံစားချက်ကို ငြိမ်အောင် ထိန်းထားနိုင်တယ်။ အသက်ခပ်ပြင်းပြင်းရှူလိုက်တာမျိုး၊ စိတ်အေးအေးထားပြီး စဉ်းစားဆင်ခြင်တာမျိုး လုပ်နိုင်တယ်။
• အကောင်းမြင်စိတ်ရှိခြင်း
  အခြေအနေ ဆိုးဝါးနေရင်တောင် အဆိုးထဲကနေ ကောင်းတဲ့အကွက်ကို ရှာဖွေတတ်တယ်။
  .

၃။ သူတစ်ပါးကို စာနာနားလည်နိုင်စွမ်း (Social-awareness)

• ကိုယ်ချင်းစာတရားရှိခြင်း
  သူတစ်ပါးရဲ့ ခံစားချက်၊ သဘောထားနဲ့ သူတို့ ဘာလိုအပ်နေလဲဆိုတာကို ကိုယ့်နေရာမှာထားပြီး ခံစားကြည့်တတ်တယ်။
• ပတ်ဝန်းကျင်ကို သတိထားခြင်း
  အဖွဲ့အစည်း ဒါမှမဟုတ် အခြေအနေတစ်ခုရဲ့ အခြေအနေကို နားလည်တယ်။ အခြားသူတွေရဲ့ စကားကို စိတ်ရှည်ရှည်နဲ့ အာရုံစိုက် နားထောင်တတ် ပြီး စကားလုပြောတာ၊ ဝေဖန်တာမျိုး ရှောင်တယ်။
  .

၄။ ဆက်ဆံရေးကို စီမံခန့်ခွဲနိုင်စွမ်း (Relationship Management)

• ပဋိပက္ခကို ဖြေရှင်းနိုင်ခြင်း
  ပြဿနာတွေ၊ အငြင်းပွားမှုတွေ ဖြစ်လာရင် အဖွဲ့အစည်းအတွက် အကောင်းဆုံးဖြစ်အောင် ညှိနှိုင်းဆောင်ရွက်နိုင်တယ်။
• အပြုသဘောဆောင်သော လွှမ်းမိုးမှု
  သူတစ်ပါးကို စိတ်ဓာတ်ခွန်အားပေးနိုင်ပြီး အသင်းအဖွဲ့စိတ်ဓာတ်ကို မြှင့်တင်ပေးနိုင်တယ်။
  …
  …

💡လူမှုဆက်ဆံရေး ပွတ်တိုက်မှုတွေ မကြီးမားအောင် ကာကွယ်ဖို့နဲ့ ဖြေရှင်းဖို့အတွက် EQ မြင့်တဲ့သူတွေ ကျင့်သုံးတဲ့ အဓိကနည်းလမ်းတွေကတော့-

၁။ တွေးပုံပြောင်းပါ –
“ အဖြစ်အပျက်တိုင်းမှာ အကြောင်းရင်းရှိတယ်”

• ချက်ချင်း မဆုံးဖြတ်ပါနဲ့
  တစ်စုံတစ်ယောက်က ကိုယ့်ကို စိတ်အနှောင့်အယှက်ဖြစ်အောင် ပြောဆိုပြုမူလာရင် ချက်ချင်း ဒေါသမထွက်ပါနဲ့။ “ သူဘာကြောင့် ဒီလိုလုပ်တာလဲ” ဆိုတဲ့ အကြောင်းရင်းကို စဉ်းစားပါ။ • ကိုယ်တွင်းက အရင်ရှာပါ
  ပြဿနာဖြစ်ပြီဆိုရင် သူများကို အပြစ်မတင်မိခင် ကိုယ့်ရဲ့ အပြုအမူ၊ စကားပြောပုံမှာ ဘာများ မှားယွင်းသွားလဲဆိုတာ ပြန်သုံးသပ်ကြည့်ပါ။ • ပုံကြီးမချဲ့ပါနဲ့
  အခက်အခဲ ဒါမှမဟုတ် ပြဿနာသေးသေးလေးကို တအားအရေးကြီးတဲ့ ကိစ္စကြီးတစ်ခုလို မမှတ်ယူဘဲ အကျိုးသင့်အကြောင်းသင့် စဉ်းစားဆင်ခြင်တတ်တဲ့ အလေ့အကျင့်ကို‌မွေးပါ။
  .

၂။ လုပ်ဆောင်ပုံပြောင်းပါ
“ နားထောင်ခြင်းနဲ့ တည်ငြိမ်မှု”

• အာရုံစိုက် နားထောင်ခြင်း
  အငြင်းပွားမှု ဖြစ်လာပြီဆိုရင် ကိုယ်ပြောချင်တာကို အတင်းအကျပ် မပြောခင် တစ်ဖက်သားရဲ့ စကားကို အဆုံးအထိ စိတ်ဝင်တစား နားထောင်ပေးပါ။ ကိုယ်ချင်းစာစိတ်နဲ့ နားလည်ပေးပါ။
• တည်ငြိမ်စွာ တုံ့ပြန်ခြင်း
  စိတ်ဖိစီးမှုများတဲ့ အခြေအနေမှာတောင် စိတ်အေးအေးထားပြီး ဖြေရှင်းနိုင်စွမ်းရှိဖို့ လိုပါတယ်။ စိတ်လိုက်မာန်ပါ စကားလုံးတွေ၊ အော်ဟစ်ဆူပူမှုတွေက ပွတ်တိုက်မှုကို ပိုကြီးစေပါတယ်။
• အချိန်ယူပြီး ဆုံးဖြတ်ခြင်း
  ခံစားချက် အရမ်းပြင်းထန်နေချိန်မှာ အရေးကြီးတဲ့ ဆုံးဖြတ်ချက်တွေ မချပါနဲ့။ ခဏတာ အနားယူပြီးမှ စိတ်တည်ငြိမ်အောင်ထားပြီး ဆုံးဖြတ်ပါ။ • ပွင့်ပွင့်လင်းလင်း ပြောပြပါ
  ကိုယ့်ရဲ့ ခံစားချက်၊ လိုအပ်ချက် ဒါမှမဟုတ် မကြိုက်တဲ့အရာတွေကို ရန်လိုတဲ့ ပုံစံမျိုး မဟုတ်ဘဲ ပြတ်သားပြီး ယဉ်ကျေးတဲ့ စကားလုံးတွေ နဲ့ ပြောဆိုပါ။
  (ဥပမာ- “ မင်းက အမြဲ ဒီလိုပဲ” လို့ ပြောမယ့်အစား “ မင်းဒီလိုလုပ်တဲ့အခါ ငါစိတ်မကောင်းဖြစ်ရတယ်” လို့ ကိုယ့်ခံစားချက်ကို ထည့်ပြောပါ)။
  …
  …

EQ ဆိုတာ မွေးရာပါ မဟုတ်ပါဘူး။ နေ့စဉ်ဘဝမှာ သတိထားပြီး လေ့ကျင့်ယူလို့ရတဲ့ စူပါပါဝါ (Superpower) တစ်ခုလိုပါပဲ။

ကိုယ့်ခံစားချက်ကို သတိထားကြည့်မယ်၊ သူတစ်ပါးကိုလည်း စာနာပေးမယ်၊ အကောင်းမြင်စိတ်မွေးမယ် စတဲ့ စိတ်လေ့ကျင့်ခန်းတွေဟာ ကိုယ့်ရဲ့ဆက်ဆံရေး လမ်းကြောင်းပေါ်က ခလုတ်တိုက်စရာ ပွတ်တိုက်မှုတွေကို ဖယ်ရှားပေးမယ့် တာယာတွေလိုပါပဲ။

ဒါကြောင့် ကိုယ့်ရဲ့ EQ ကို ရင်းနှီးမြှုပ်နှံပါ။ ဒီနေ့ကစပြီး အလေ့အကျင့် လုပ်ကြည့်ပါ။ နားထောင်ပါ၊ ကိုယ်ချင်းစာပါ။

အဲဒီအခါ ကိုယ့်ဘဝရဲ့ အဖုအထစ်တွေ၊ ပွတ်တိုက်မှု‌တွေ လျော့နည်းပြီး ဆက်ဆံရေးတွေ ချောမွေ့လှပလာပါလိမ့်မယ်…။

သင်၏စိတ်ကလေး ကျန်းမာစေဖို့ ‌
ဒေါက်တာမီ

..

..

❤️NUG, MOH တယ်လီကျန်းမာ၊ လူတိုင်းအတွက်ပါ ❤️

👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။

*** ပိတ်ရက်မရှိပါ ***

ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။

https://m.me/telehealthmm

(နေ့စဥ် မနက် ၈ နာရီမှ ည ၁၀ နာရီအထိ)

…

…

👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….

မိမိကိုယ်ကိုသေကြောင်းကြံစည်မှု လုံးဝမရှိစေရ

Zero Suicide Hotline သို့ ဆက်သွယ်ရန်

(၁) https://t.me/zeroscbot

(မနက် (၈) နာရီမှ နေ့လယ် (၁၂) နာရီ

ညနေ (၆) နာရီမှ ည (၁၀) နာရီအတွင်း)

*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***

Ministry of Health,

National Unity Government.