” ခန္ဓာကိုယ်အနေအထား ပုံစံမှန်ခြင်း၏ ကောင်းကျိုးများ “

ခန္ဓာကိုယ်အနေအထား ကျော့ရှင်းတာလို့ လူသိများတဲ့ မှန်ကန်တဲ့ခန္ဓာကိုယ်ပုံစံ (Good posture)ကို ဆေးပညာအခေါ်အရတော့ ပုံမှန်ကျောရိုးတိုင်အနေအထား “neutral spine” လို့ ခေါ် ကြပါတယ်။

ယေဘုယျအားဖြင့် ပုံမှန်သဘာဝအတိုင်း ဖြစ်နေတဲ့ ကျေားရိုးအကွေးတွေကို ပုံစံမပျက်စေဘဲ ခါးမတ်မတ် ခေါင်းမတ်မတ် အနေအထားဖြင့်နေထိုင်ခြင်းကို ဆိုလိုတာပါ။

ကျောရိုးတိုင်အနေအထားလေးကို လေ့လာကြည့်မယ် ဆိုရင် ခုံးနေတဲ့နေရာနဲ့ ခွက်နေတဲ့နေရာဆိုပြီး (၂) မျိုးရှိပါတယ်။

မိခင်ဝမ်းတွင်း နေနေစဥ်တုန်းက သန္ဓေသားလေးဟာ ကွေးကွေးလေး နေနေခဲ့ရသလို သူ့ရဲ့ကျောရိုးတိုင်ဟာလည်း ” C ” ပုံစံ ကွေးကွေးလေးပါပဲ။

မွေးပြီးလို့ ကလေးအရွယ် ခေါင်းစထောင်တဲ့အချိန်မှာတော့ လည်ပင်းကျောရိုးနဲ့….လေးဘက်သွားတဲ့အချိန်မှာ ခါးကျောရိုးတွေဟာ ပုံစံအပြောင်းအလဲဖြစ်လာပြီးမှ ၊ ပုံမှန်ကျောရိုးတိုင်အနေအထား ဖြစ်လာတာဖြစ်ပါတယ်။

ကျောရိုးမကြီး ခုံးနေတဲ့ အပိုင်းကို Primary(Foetal) Curvature လို့ခေါ်ပြီး အင်္ဂလိပ်အက္ခရာ “C” ပုံစံလို့ တင်စားကြပါတယ်။ ပုံမှန်ကျောရိုးရဲ့ ရင်ဖက်ပိုင်းနဲ့ မီးညှောင့်ရိုးပိုင်းလေးတွေက ကျောရိုးခုံးတဲ့ အပိုင်းလေးတွေဖြစ်ပါတယ်။

ကျောရိုးမကြီး ခွက်ဝင်နေတဲ့ပုံစံရှိတဲ့ အပိုင်းလေးတွေကိုတော့ Secondary (compensatory) curvature လို့ခေါ်ပြီး လည်ပင်းရိုးပိုင်းနဲ့ ခါးပိုင်းနေရာလေးတွေက ကျောရိုးခွက်ဝင်နေတဲ့ ပုံစံရှိတဲ့ အပိုင်းလေးတွေဖြစ်ပါတယ်။

…

လူတစ်ယောက်ဟာ ပုံမှန်ခါးရိုးအနေအထားရှိနေဖို့ လိုအပ်ပါတယ်။ မတ်တပ်ရပ်တာ၊ လမ်းလျှောက်တာနဲ့ ထိုင်တာတွေမှာ ကျောရိုးကို ပုံမှန်လေးအတိုင်း နေထိုင်ပေးဖို့လိုအပ်ပါတယ်။

ပုံမှန်ကျောရိုးပုံစံ (Good posture) ရှိနေတာရဲ့ကောင်းကျိုးတွေကတော့ …

(၁) ခါးနာတာကို လျော့နည်းစေပါတယ်။

ခန္ဓာကိုယ်ကို အချိန်အကြာကြီး ပျော့တိပျော့ခွေ မတ်တတ်ရပ်နေတာ (ဒါမှမဟုတ်) ခါးကိုကုန်းပြီးထိုင်နေတာမျိုးတွေဟာ ခါးကို ဖိအားပေးသလိုဖြစ်စေပြီး ခါးရိုးအဆစ်လေးတွေနဲ့ ကြွက်သားတွေကိုဖိအားသက်ရောက်စေတာမို့လို့ ခါးနာတတ်ပါတယ်။ ဒါ့ကြောင့် ခန္ဓာကိုယ်ကို မတ်မတ်လေးရပ်ပေးဖို့၊ ထိုင်ပေးဖို့ အရေးကြီးပါတယ်။

(၂) ခေါင်းကိုက်တာကို လျော့နည်းစေပါတယ်။

လည်ပင်းနောက်မှာရှိတဲ့ ကြွက်သားတွေရဲ့ တင်းမာမှုကြောင့်ဖြစ်တဲ့ ခေါင်းကိုက်တာ (tension headache) ကို သက်သာစေပါတယ်။

(၃) လူကို တက်တက်ကြွကြွ ရှိစေပါတယ်။

အရိုးနဲ့ အဆစ်တွေ နေရာတကျရှိတဲ့အခါ ကြွက်သားတွေအတွက် ဝန်ပေါ့သွားပြီး တင်းမာမှုတွေ လျော့နည်းစေပါတယ်။

(၄) ပုခုံးနဲ့ လည်ပင်းကြွက်သားတွေ တင်းမာတာကို လျော့နည်းစေပါတယ်။

ပုံမှန်မဟုတ်တဲ့ပုံစံနဲ့ ဦးခေါင်းအရှေ့ငိုက်နေတာဟာ ကျောအပေါ် ပိုင်း၊ ပုခုံးနဲ့ လည်ပင်းမှာရှိတဲ့ တချို့ ကြွက်သားတွေကို တင်းမာစေပါတယ်။

(၅) အရိုးဆစ်တွေ ပွန်းပဲ့တဲ့ အန္တရာယ်ကို လျော့နည်းစေပါတယ်။

ကွေးစောင်းနေတာ (ဥပမာ- ခြေထောက် တဖက်တည်းပေါ် ရပ်တာ (ဒါမှမဟုတ်) ခန္ဓာကိုယ်ရဲ့ ဘေးတွေကို ဖိအားပေးတာ)ဟာ တင်ပါးဆုံ ကြွက်သားတွေကို တင်းမာစေပြီး ခါးအောက်ပိုင်းနာတတ်သလို ကြာလာရင်လည်း ခါးအဆစ်လေးတွေပုံစံမမှန်တဲ့အတွက် ပြဿနာရှိလာနိုင်ပါတယ်။

(၆) အဆုတ်ရဲ့ စွမ်းဆောင်နိုင်စွမ်းကို တိုးမြှင့်ပေးပါတယ်။

ကုန်းနေတာဟာ အဆုတ်ကို ဖိထားသလို ဖြစ်စေပါတယ်။ မတ်မတ်နေတာက အဆုတ်အတွက် နေရာပိုပေးသလို ဖြစ်ပြီး အောက်စီဂျင် ပိုရစေပါတယ်။

(၇) သွေးလည်ပတ်မှု ပိုကောင်းစေပြီး အစာပိုကြေပါတယ်။

ခါးရိုးပုံစံ မမှန်ဘဲနေတဲ့အခါ ခန္ဓာကိုယ်အင်္ဂါတွေကို ဖိထားသလိုဖြစ်တတ်တဲ့အတွက် သွေးလည်ပတ်မှုကို လျော့နည်းစေပြီး စွမ်းဆောင်နိုင်စွမ်းကိုလည်း ကျဆင်းစေပါတယ်။

(၈) မေးရိုးအဆစ်တွေ နာကျင်မှုကို သက်သာစေပါတယ်။

ခေါင်းအရှေ့ငိုက်ထားတာကြာလာတဲ့အခါ မေးရိုးဆစ်နဲ့ မေးရိုးကြွက်သားတွေကို တောင့်တင်းစေပြီး စားတဲ့အခါ၊ စကားပြောတဲ့အခါနဲ့ သန်းဝေတဲ့အခါမှာ မေးရိုးတစ်လျှောက် နာကျင်တာမျိုး ဖြစ်စေတတ်ပါတယ်။ ပါးစပ်ဖွင့်တဲ့အခါ ဖြောက်ခနဲ မြည်တာမျိုးလည်း ဖြစ်တတ်ပြီး ခေါင်းကိုက်တာလည်း ဖြစ်နိုင်ပါတယ်။

(၉) ကြွက်သားတွေ အားကောင်းစေပါတယ်။

ခန္ဓာကိုယ်အနေအထားမှန်ဖို့ဆိုရင် ဝမ်းဗိုက်နဲ့ ကျောပြင်အပေါ်ပိုင်း ကြွက်သားတွေကို တောက်လျှောက် အသုံးပြုရတဲ့အတွက် ကြွက်သားတွေ အားကောင်းလာပါတယ်။

(၁၀) လေ့ကျင့်ခန်းလုပ်တဲ့အခါမှာလည်း ခန္ဓာကိုယ်အနေအထား ပိုကောင်းစေပါတယ်။

ခန္ဓာကိုယ် အနေအထားဟာ ထိုင်တာ၊ ထတာအတွက်သာ မဟုတ်ဘဲ လေ့ကျင့်ခန်းလုပ်တဲ့အခါမှာလည်း အကျိုးသက်ရောက်မှု ရှိပါတယ်။

(ဥပမာ- ကျောမတ်မတ်ထားကာ ဝမ်းဗိုက်ကြွက်သားတွေ အသုံးပြုပြီး ဆောင့်ကြောင့်ထိုင်တာ(squat) ဟာ ခါးဒဏ်ရာမရအောင် ကာကွယ်သလို ဖြစ်ပါတယ်။)

(၁၁) သင့်ကို အရပ်ပိုရှည်သလို ဖြစ်စေပါတယ်။

ခန္ဓာကိုယ်အနေအထားပုံမှန်နေတာဟာ ကျော့ရှင်းလှပပြီး ဆွဲဆောင်မှုအားပိုကောင်းစေပါတယ်။

(၁၂) ကိုယ်ပိုင် ယုံကြည်မှု (self confidence) တက်စေပါတယ်။

ခန္ဓာကိုယ် အနေအထားဟာ သင့်ကို တက်တက်ကြွကြွဖြစ်စေပြီး နာကျင်မှုတွေ လျော့နည်းသက်သာစေရုံသာမက မိမိကိုယ်မိမိ ယုံကြည်မှု၊ တန်ဖိုးထားမှုကိုလည်း တိုးတက်စေပါတယ်။

*** မှတ်သားဖွယ်တစ်ခုအနေနဲ့ ခါးနဲ့ခေါင်းကို မတ်မတ်ထားပြီး ကျောရိုးပုံစံမှန်အနေအထားနဲ့နေဖို့ အရေးကြီးသလို….အလွန်အကျွံ ရင်ကော့ ဖင်ကောက်ပြီးနေတာမျိုး ( over lordosis )ဟာလည်း ခါးရိုးဆစ်တွေကို ဒဏ်ဖြစ်စေ ရောဂါဖြစ်စေကြောင်းလည်း မှတ်သားထားစေလိုပါတယ် ***

ကျောရိုးအနေအထားပုံစံတကျနဲ့ ပုံမှန်နေတာဟာ ဆေးထိုး၊ ဆေးစားစရာမလိုပဲ ခန္ဓာကိုယ်အတွက်ကောင်းကျိုးတွေအများကြီးရှိတာမို့ ပုံကျကျလေးလှကြအောင်နော်