” တင်းတိပ်ပြဿနာ “
တင်းတိပ်ဆိုတာ ဘာလဲ ?
တင်းတိပ်ဆိုတာ အရေပြားမှာ ရောင်ခြယ်ပစ္စည်းတစ်မျိုးဖြစ်တဲ့ Melanin တွေစုပြီး အမဲကွက်/ အညိုကွက်အနေနဲ့ အကွက်ခပ်ကြီးကြီး ပေါ်လာတာဖြစ်ပြီး များသောအားဖြင့် ပါးပြင်၊ နဖူး၊ နှာခေါင်း၊ နှုတ်ခမ်းအပေါ် ၊ မေးစေ့၊ လည်ပင်း၊ လက်မောင်းနဲ့ ကျောပြင်တွေမှာ အတွေ့များပါတယ်။
.
ဘယ်သူတွေမှာ တင်းတိပ်ဖြစ်တာများလဲ ?
တင်းတိပ်က အသက် ၂၀ နဲ့ ၄၀ ကြားမှာ အဖြစ်များပြီး အထူးသဖြင့် ကိုယ်ဝန်ဆောင် အမျိုးသမီးတွေမှာ ဟော်မုန်း အပြောင်းအလဲတွေကြောင့် ပိုအဖြစ်များပါတယ်။
အမျိုးသမီးတွေဟာ အမျိုးသားတွေထက် ၉ ဆလောက် ပိုအဖြစ်များကြောင်းလည်း တွေ့ရှိရပါတယ်။
.
ဘာကြောင့် တင်းတိပ်ဖြစ်လဲ ?
နေရောင်ခြည်နဲ့ထိတွေ့မှု အချိန်ကြာခြင်းဟာ တင်းတိပ်ဖြစ်စေတဲ့ အဓိက အဖြစ်အများဆုံး အကြောင်းအရင်းပါ။
ဒါ့အပြင် ခန္ဓာကိုယ်မှာ အမျိုးသမီးဟော်မုန်းတွေ များနေတာ၊ ကိုယ်ဝန်တားဆေး အသုံးပြုနေတာ၊ laptop ၊ တီဗွီ၊ ဖုန်း အစရှိတဲ့ electronic devices တွေက ထွက်ရှိတဲ့ LED မီးအလင်းတန်းတွေနဲ့ ထိတွေ့မှုများတာ၊ Waxing မကြာခဏ ပြုလုပ်တာနဲ့ အသားအရေ ထိခိုက်စေတတ်တဲ့ အလှကုန်ပစ္စည်းတွေ အသုံးပြုတာ စတာတွေကြောင့်လည်း တင်းတိပ်ဖြစ်စေပါတယ် ။
.
တင်းတိပ် သက်သာအောင် ဘယ်လိုလုပ်ရမလဲ ?
တင်းတိပ်ဖြစ်စေတဲ့ အကြောင်းအရင်းတွေကို ရှောင်ရပါမယ်။
နေရောင်ခြည်နဲ့ ထိတွေ့တာများတဲ့အခါ SPF ပါဝင်တဲ့ Sunscreen ကို ၂ နာရီခြားတစ်ခါ လိမ်းပေးတာ၊ နေရောင်ခြည်ဒဏ်မှကာကွယ်ဖို့ ထီး၊ ဦးထုပ်ဆောင်းပေးတာတွေ ပြုလုပ်ပေးရပါမယ်။
ကိုယ်ဝန်ဆောင်ချိန် တင်းတိပ်ထွက်တာကတော့ မွေးဖွားပြီးချိန်မှာ ပြန်လည်သက်သာသွားတာ များပါတယ်။
.
ဆေးခန်းပြဖို့ လိုအပ်လား ?
တင်းတိပ်ဟာ အဓိက အလှအပပြဿနာ ဖြစ်တာမို့ တင်းတိပ်ပျောက်ဖို့ ဆေးခန်းပြလို့ရပါတယ်။
တင်းတိပ်က အရေပြားအောက် Melanin တွေ စုပြီးဖြစ်တာကြောင့် Melanin နည်းလာအောင်….
• Azelaic Acid, Cysteamine, hydrocortisone, Topical alpha hydroxyacid, Vitamin C ပါတဲ့ Cream တွေ လိမ်းပေးလို့ရပါတယ်။
(ဆရာဝန် ညွှန်ကြားချက်နဲ့သာ အသုံးပြုသင့်ပါတယ်)
• အလှအပဆိုင်ရာ ဆရာဝန်တွေနဲ့ တိုင်ပင်ပြီး Laser ပစ်တာ (ဒါမှမဟုတ်) Chemical peeling သုံးတာမျိုးတွေကလည်း တင်းတိပ်သက်သာစေပါတယ်။
• အချို့လူတွေမှာ Vitamin D နေ့စဉ် သောက်ခြင်းဖြင့်လည်း တင်းတိပ်သက်သာစေတာကို တွေ့ရှိရပါတယ်။
.
နိဂုံးချုပ်အနေနဲ့ ခြုံငုံပြောရရင်…
အဓိကအားဖြင့် နေရောင်ခြည်ကို နှစ်ရှည် ထိတွေ့မှုများတာကြောင့် တင်းတိပ် ဖြစ်လာခဲ့တာဆိုရင်တော့ ပျောက်ကင်းကုသဖို့ကလည်း အချိန်ကြာနိုင်ပါတယ်။
ဒါကြောင့် တင်းတိပ်မဖြစ်ရလေအောင် နေရောင်ခြည်ကာကွယ်တဲ့ Sunscreen တွေလိမ်းပေးတာ၊ နေရောင်ခြည်နဲ့ တိုက်ရိုက်မထိတွေ့စေဖို့ အကာအကွယ်အဖြစ် ထီးဆောင်းတာ၊ ဦးထုပ်ဆောင်းတာ၊ လုံလုံခြုံခြုံရှိတဲ့ အင်္ကျီအဝတ်အစားတွေ ဝတ်ဆင်ပေးတာ စတာတွေနဲ့ ကြိုတင်ကာကွယ်တာ အကောင်းဆုံးပါ။
တင်းတိပ်ဟာ ကျန်းမာရေးပြဿနာ ဆိုတာထက် အလှအပဆိုင်ရာ ပြဿနာတစ်ခုသာဖြစ်ပြီး၊ တင်းတိပ်ကနေ အရေပြားကင်ဆာ ပြောင်းတာမျိုးကတော့ မရှိပါဘူး။
Ref : 
https://my.clevelandclinic.org/health/diseases/21454-melasma
NUG, MOH တယ်လီကျန်းမာ ၊ လူတိုင်းအတွက်ပါ
တယ်လီကျန်းမာတွင် ဆရာဝန်များနှင့် အွန်လိုင်းမှ အခမဲ့တိုင်ပင်ဆွေးနွေးနိုင်ပါသည်
*** ပိတ်ရက်မရှိပါ ***
ကြိုတင်ဘိုကင်ယူရန်အတွက်( https://m.me/telehealthmm )ကို နှိပ်ပါ
( နေ့စဥ် မနက် ၈နာရီမှ ည၁၀နာရီအထိ )
#nugmoh#telehealth#telemedicine
#teleconsultation#တယ်လီကျန်းမာ
Ministry of Health,
National Unity Government.
Published on: 3 April 2023
Last Updated: 3 April 2023