အူကျခြင်း သို့မဟုတ် အူကျွံခြင်း
❓အူကျွံတာ အရေးကြီးလို့လားဆရာ။ အဖြစ်များလို့လား
မွေးကာစကလေးကနေ ဟိုးသက်ကြီးရွယ်အိုအထိ အူကျွံတာ/အူကျတာက ဖြစ်နိုင်ပါတယ်။ အမျိုးသမီး/ အမျိုးသား နှစ်ဦးလုံးမှာလည်း ဖြစ်နိုင်ပါတယ်။ဒါကြောင့် သိသင့်ပါတယ်။ပြီးတော့ စောစောသိပြီး ခွဲစိတ်မှုခံယူရင် အူပိတ်/အူပုပ်တဲ့အဆင့်အထိ မရောက်တော့တာမို့ ရလဒ် အင်မတန်ကောင်းပါတယ်။
❓အသက်အရွယ်မရွေး ကျား/မ မရွေး အူကျွံ/အူကျနိုင်တယ်ဆိုတော့ ဘယ်လိုတွေဖြစ်တာလဲ
ဘယ်နေရာမှာ ကျွံတာလဲဆရာ
အူကျွံ/အူကျတာက ခန္ဓာကိုယ်နေရာတော်တော်များများမှာ ( မြင်ရတဲ့ နေရာမှာရော ၊ မမြင်ရတဲ့ ၀မ်းတွင်းမှာပါ ) ကျွံနိုင်ပါတယ်။
► ဒါပေမယ့် အဖြစ်များတာကတော့
(၁) ပေါင်ခြံမှာ အူကျတာ
(၂) ချက်မှာ/ချက်နားတဝိုက်မှာ အူကျွံတာ
(၃) ခွဲထားတဲ့ ဒဏ်ရာနေရာမှာ အူကျွံတာ
(၄) ရင်ညွန့်နား/ ၀မ်းဗိုက်အလယ်မှာ အူကျွံတာ အစရှိသဖြင့်ပေါ့။
► ဘာလို့ကျွံလဲဆိုတော့ အဓိက ကတော့
(က) နဂိုတည်းက အူကျဖို့/အူကျွံဖို့ မွေးရာပါလမ်းကြောင်းလေးရှိနေပြီးသားကို ညှစ်မိလို့
(၀မ်းချုပ်လို့ညှစ် ၊ အလေးအပင်မလို့ ညှစ်/ ချောင်းဆိုးလို့ညှစ်/ ဆီးကျိတ်ရှိလို့ ဆီးညှစ်ပေါက်)
(ခ) ၀လို့/ကလေး ခဏခဏမွေးလို့/ အသက်ကြီးလို့ကြွက်သားတွေလျော့ရဲလာတာတွေကြောင့် အူကျွံ/အူကျပါတယ်။
❓မကျွံအောင် ကြိုတင် ကာကွယ်လို့ရလားဆရာ
ခွဲတဲ့ဒဏ်ရာ နေရာကနေ အူကျွံတာ/ ၀လို့အူကျွံတာတွေမှာတော့ မဖြစ်အောင် ကာကွယ်လို့ရပါတယ်။ ဘယ်လိုကာကွယ်ရမလဲဆိုတော့- ခွဲစိတ်ပြီး ၃လ-၆လကြာမှ အတွင်းချုပ်ရိုးက ခိုင်ပါတယ်။ ဒါကြောင့် ခွဲစိတ်ပြီး ၃လ-၆လအထိ ၀မ်းမချုပ်ပါစေနဲ့။ (ရေများများသောက်၊ အသီးအရွက်များများစား၊လေ့ကျင့်ခန်းလုပ်ပါ) ချောင်းမဆိုးပါစေနဲ့။ ချောင်းဆိုးရင် ဆေးသေချာသောက်ပါ။ ရင်ကြပ်ပန်းနာ/ အဆုတ်ရောင်အဆုတ်ပွရောဂါရှိရင် ရောဂါကို သေချာကုပါ။ အလေးအပင် မ,မရပါ။ -၀လာရင် ဝိတ်ချပါ။ အစားလျော့ပါ။ လေ့ကျင့်ခန်းလုပ်ပါ။ ဒါဆို ထိုက်သင့်သလောက် ကာကွယ်နိုင်ပါတယ်။
❓ကာကွယ်လို့မရတာတွေကျတော့ရော ဆရာ
ကာကွယ်လို့မရတဲ့ အူကျွံ/အူကျတာဖြစ်ဖြစ်၊ ကာကွယ်လို့ရသော်လည်း မလိုက်နာမိလို့ ဖြစ်လာတဲ့ အူကျွံတာ/အူကျတာဖြစ်ဖြစ် စောစောသိရင် စောစောခွဲသင့်ပါတယ်။ အူကျွံ/အူကျတာအတွက် ဟိုးမွေးကင်းစကနေ လူကြီးအထိ ခွဲစိတ်နည်းတစ်ခုကပဲ ကုထုံးအမှန်ပါ။
အူကျွံတာ/အူကျတာက အဆင့်ဆင့်ရှိပါတယ်။
(၁) နည်းနည်းထွက်လာ/ သူ့အလိုလိုပြန်၀င်/ ၀င်လိုက်ထွက်လိုက်ဖြစ်
(၂) ပိုကြီးလာ (ပေါင်ခြံအူကျတာဆို အောက်အထိကျလာ) ၀င်လိုက်ထွက်လိုက်ပဲ
(၃) လက်နဲ့ထည့်မှ ပြန်၀င်
(၄) ပြန်မ၀င်တော့ဘူး
(၅) နာလာမယ် သို့ အူပိတ် ( အန်၊ ဗိုက်တင်း၊ လေမလည်၊ ၀မ်းမသွားတော့ဘူး)
(၆) အူပုပ် သို့ အူပေါက် (နာလာ/အူကျတဲ့နေရာနီလာ/ဖျားလာ)
ဒီအဆင့်တွေမှာ ပြန်မ၀င်တာကစပြီး အန္တရာယ်ရှိပါတယ်။ ပြန်မ၀င်တာကို အချိန်မီ မခွဲရင် အူပိတ်နိုင်ပါတယ်။ ပြီးရင် အူပုပ်/အူပေါက်နိုင်ပါတယ်။
အဲလိုတွေ အူပုပ်/အူပေါက်တွေဖြစ်လာခဲ့ရင် အရေးပေါ်ခွဲရမှာပါ၊ မကောင်းတဲ့အူကို ဖြတ်ပြီးပြန်ဆက်ရတာတွေ အထိကျယ်ပြန့်နိုင်ပါတယ်။
❓ဘယ်လိုခွဲလို့ရလဲဆရာ ဟို ခုခေတ်စားနေတဲ့အပေါက်ကလေးတွေနဲ့ရော ( keyhole surgery) ခွဲလို့ရလား
ရိုးရိုးခွဲလို့လည်း ရသလို အပေါက်ကလေးတွေနဲ့လည်း ခွဲလို့ရပါတယ်။ စောစောသိလို့ စောစောခွဲရင် ရလဒ်ပိုကောင်းပါတယ်။ လူနာ သက်သာပါတယ်။
❓ခွဲပြီးရင်ကော ပြန်ဖြစ်နိုင်လားဆရာ
ခွဲပြီးရင်လည်း အပေါ်မှာ ပထမပြောထားတဲ့ အနေအထိုင် ဆင်ခြင်နည်းတွေကို ဂရုစိုက်ရမှာပါ။ ၃လ-၆လ အထိ ၀မ်းမချုပ်စေနဲ့။ ချောင်းမဆိုးစေနဲ့။အလေးအပင်မ,မနဲ့။ ရင်ကြပ်ပန်းနာ အဆုတ်ရောင်အဆုတ်ပွရောဂါရှိရင် သေချာကုပါ။ ဆီးကျိတ်သေချာကုပါ။ ဝိတ်ချပါ။ ကလေးယူမယ်ဆိုလည်း တစ်နှစ်ကျော်မှ ယူရပါမယ်။ အမှန်တော့ မခွဲခင်တည်းကလည်း ဒါတွေသေချာပြင်ဆင်ပြီးခွဲရပါတယ်။ ဒါမှ ခွဲပြီး ပြန်မဖြစ်မှာပါ။ ဒါကြောင့် မပြင်မဆင်ပဲ အရေးပေါ်မခွဲရလေအောင် အေးဆေးသေချာပြင်ဆင်ပြီး စောစောစီးစီး ခွဲလိုက်တာ အကောင်းဆုံးမို့ အူကျွံ/အူကျခဲ့ရင် မပေါ့ဆဘဲ ခွဲစိတ်ဆရာ၀န်နဲ့ တိုင်ပင်ဆွေးနွေးကုသဖို့ အကြံပြုလိုက်ရပါတယ်။
❤️ NUG, MOH တယ်လီကျန်းမာ၊ လူတိုင်းအတွက်ပါ ❤️
???? တယ်လီကျန်းမာတွင် ဆရာဝန်များနှင့် အွန်လိုင်းမှ အခမဲ့တိုင်ပင်ဆွေးနွေးနိုင်ပါသည်
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ
လှူဒါန်းရန်-https://moh.nugmyanmar.org/donate/
(နေ့စဥ် မနက် ၈ နာရီမှ ည ၁၀ နာရီအထိ)
Ministry of Health,
National Unity Government.
