ကျွန်မတို့ဟာ မိခင်ရဲ့ဝမ်းကနေ မွေးဖွားလာချိန်ကစပြီး ဒီကနေ့အထိ ပြောင်းလဲခြင်းများစွာကို ဖြတ်သန်းခဲ့ကြရပါတယ်။ တချို့သော ပြောင်းလဲမှုတွေက သိမ်မွေ့လွန်းတာကြောင့် ကိုယ်တိုင်တောင် သတိမထားမိဘဲ သဘာဝကျကျ ဖြတ်ကျော်နိုင်ခဲ့ကြပါတယ်။
ဥပမာ – ကလေးဘဝကနေ လူငယ်ဘဝကို ကူးပြောင်းတာမျိုး၊ ကျောင်းသားဘဝကနေ လုပ်ငန်းခွင်ထဲ ရောက်သွားတာမျိုးတွေပေါ့။ ဒီလို အဆင့်ဆင့်ပြောင်းလဲတာတွေက တဖြည်းဖြည်းချင်း ဖြစ်ပေါ်လာတာမို့ လက်ခံရတာဟာ သိပ်မခက်ခဲလှပါဘူး။
ဒါပေမယ့် တချို့သော ပြောင်းလဲမှုတွေကတော့ ကျွန်မတို့ကို နာကျင်စေပါတယ်။ မမျှော်လင့်ဘဲ ရုတ်တရက်ကြုံတွေ့ရတဲ့ ပြောင်းလဲမှုတွေက စိတ်ကို လှုပ်ခတ်သွားစေတတ်ပါတယ်။
🤕 ချစ်ရသူနဲ့ ခွဲခွာရခြင်း
🤕 အလုပ်အကိုင် ဆုံးရှုံးခြင်း
🤕 ကျန်းမာရေး ချို့ယွင်းလာခြင်းစတဲ့ အခြေအနေမျိုးတွေပေါ့။
ဒါကြောင့်လည်း ဘဝဆိုတာဟာ “ စီးဆင်းနေတဲ့ မြစ်လိုပဲ” လို့ တင်စားကြတာဖြစ်ပါလိမ့်မယ်။ တစ်နေရာတည်းမှာ ရပ်တန့်မနေဘဲ အမြဲတမ်း စီးဆင်းပြောင်းလဲနေတတ်တာ မဟုတ်လား။
…
…
တကယ်တော့ ကျွန်မတို့ပတ်ဝန်းကျင်မှာ ရှိသမျှ အရာအားလုံးဟာ ပြောင်းလဲနေတာပါ။ ရာသီဥတုတွေဟာ အလှည့်ကျ ပြောင်းလဲသလို လူတွေဟာလည်း ပြောင်းလဲတတ်ကြပါတယ်။ အမူအကျင့်တွေ ပြောင်းလဲတတ်သလို ရုပ်ဆင်းသွင်ပြင်တွေလည်း ပြောင်းလဲနေတာပါပဲ။
ငယ်သူငယ်ချင်းတွေဟာ အချိန်ကြာလာတာနဲ့အမျှ ကိုယ်စီလမ်းကြောင်းတွေနဲ့ ကွဲပြားသွားကြသလို စိတ်နေစိတ်ထားနဲ့ အမူအကျင့်တွေကလည်း ပြောင်းလဲသွားတတ်ကြပါတယ်။ ကိုယ်တိုင်လည်း အရင်ကကြိုက်ခဲ့တာကို အခုမကြိုက်တော့တာမျိုး၊ အရင်က ဝါသနာပါတာကို အခုစိတ်မဝင်စားတော့တာမျိုးက လူတိုင်းမှာ ဖြစ်လေ့ရှိတဲ့ သဘာဝပါ။
ဒီတော့ ပြောင်းလဲခြင်းတွေကို လက်ခံတတ်ဖို့ဆိုတာဟာ သတ္တိလိုပါတယ်။ တစ်ခါတလေမှာ တစ်ဖက်လူ ပြောင်းလဲသွားတာကို ကျွန်မတို့က အံ့ဩမိတတ်ကြသလို စိတ်ထဲမှာ မနှစ်မြို့တတ်ကြပါဘူး။ “ အရင်က ဒီလိုမဟုတ်ပါဘူး” ဆိုတဲ့ အတွေးနဲ့ နာကျင်တတ်ကြတယ်မဟုတ်လား။ အထူးသဖြင့် Relationship (သမီးရည်းစားဆက်ဆံရေး) တွေမှာပေါ့။
ဒါကို ကျော်လွှားဖို့ဆိုရင် တစ်နည်းအားဖြင့် Move on နိုင်ဖို့ဆိုရင် ဒီပြောင်းလဲခြင်းတွေကို အရင်ဆုံး လက်ခံပေးဖို့ လိုအပ်ပါတယ်။
တချို့အရာတွေဟာ ကျွန်မတို့ရဲ့ ထိန်းချုပ်မှုအောက်မှာ ရှိမနေပါဘူး။ အခြားသူရဲ့ ဆုံးဖြတ်ချက်၊ သဘာဝဘေးအန္တရာယ်နဲ့ လူမှုရေးအခြေအနေတွေကို လိုက်ပြီးပြောင်းလဲတတ်တာမို့ ဒါတွေကို အားမလိုအားမရနဲ့ အပြစ်တင်နေမယ့်အစား ကိုယ့်ရဲ့ ထိန်းချုပ်မှုအောက်မှာရှိနေတဲ့ မိမိရဲ့စိတ်ကလေးကိုပဲ အရင်ဆုံး ပြန်ကြည့်ပေးပါ။
…
…
တကယ်တော့ ဘယ်လိုပြောင်းလဲခြင်းမျိုးပဲ ဖြစ်ဖြစ် နောက်ဆုံးမှာ ကျွန်မတို့ဟာ လက်ခံဖို့ကြိုးစားရင်းနဲ့ပဲ ခံနိုင်ရည်ကို မွေးကြရတာ မဟုတ်လား။
🤕 ဝမ်းနည်းရင် ဝမ်းနည်းခွင့်ပေးလိုက်ပါ။
🤕 နာကျင်ရင်လည်း နာကျင်ခွင့်ပေးလိုက်ပါ။
ဒါပေမယ့် ဒါတွေဟာ ခဏတာ (ယာယီ) သာ ဖြစ်တယ်ဆိုတာကို သတိရပါ။ ခံစားချက်တွေကလည်း အချိန်တန်ရင် ပြောင်းလဲသွားမှာပါနော်။
ဝမ်းနည်းစရာတွေကို သိပ်ကြာကြာ မဖြတ်သန်းရသလို ပျော်ရွှင်စရာတွေကြုံရင်လည်း တစ်ချိန်မှာ ကုန်ဆုံးသွားမှာပါ။ အရာအားလုံးဟာ ခဏတာမို့ ဒီအမှန်တရားကို နက်နက်ရှိုင်းရှိုင်း သဘောပေါက်ထားရင် ပြောင်းလဲခြင်းတွေကို ပေါ့ပေါ့ပါးပါးနဲ့ လှပစွာ လက်ခံနိုင်လာပါလိမ့်မယ်။
ဒီလိုမျိုး အတက်အကျတွေများလွန်းတဲ့ ဘဝကြီးမှာ ပြောင်းလဲခြင်းတွေကို လက်ခံနိုင်လာတဲ့အခါ ကျွန်မတို့ဟာ ပစ္စုပ္ပန်မှာ ပိုပြီးငြိမ်းချမ်းစွာ တည်ရှိနေနိုင်မှာ ဖြစ်ပါတယ်…။
သင်၏စိတ်ကလေး ကျန်းမာစေဖို့
ဒေါက်တာမီ
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
