ဤရက်ပိုင်း အခါလွန်မိုးရက်များကား မကြုံစဘူး ထူးခြားရှည်လျားလှပါဘိတောင်း။
သို့အတွက်ကြောင့် အပျင်းတကာ့ထွဋ်ခေါင် အကျွန်ုပ် ဖွတ်မင်းနောင်မှာ အလုပ်မသွား အပျင်းတရားစီးဖြန်းရန်အလို့ငှာ ပူသည် အေးသည်၊ ဆာလောင်သည်နှင့် ပြည့်အင့်သည်၊ စောသည် နောက်ကျသည် ဤခြောက်ဖြာသော ချပ်ဝတ်တန်ဆာကိုသာ မြဲမြံစွာ ဝတ်ဆင်ထားတော့သည်။
စိတ်အစဥ်ဝယ် ယခင် ယမကာလုလင်ဘဝကိုလည်း ပြန်လည်အောက်မေ့သည် ဖြစ်မိ၏။ ယစ်ရွှေရည်အပေါ် စွဲလမ်းခြင်း အာသာရမ္မက် ဟုန်းဟုန်းတက်စေရန်အလို့ငှာ ညှို့ငင်မြှူဆွယ် တင့်တယ်သည့် အဆင်းရှိသော အရောင်းကိုယ်စားလှယ် နတ်မိမယ်လေးများကိုလည်း ပြန်လည်ရေတွက်နေမိတော့သည်။
အကျွန်ုပ်ဘဝ၌ သေရည်အရက်ကို လုံးဝရှောင်ရှားရန် ငြင်းဆန်ဖို့အရေး အလျင်းမပေးဘဲ တုတ်နှောင်ထွေးထားသော အလှပဂေး သူယောင်မယ်လေးများကို တန်းစီဖြတ်လျှောက် တစ်ခဏလောက် ပြောရမည်ဆိုပါလျှင် . . .
- အတာရေသဘင်အစ ဆေးပေါင်းခအဆုံး ဆယ့်နှစ်လရာသီ ဝှဲချီးကျင်းပကြသည့် ပျော်ရွှင်စရာ ပွဲတော်များနှင့်အတူ တွေ့ကြရသည့် လှပျိုဖြူလေးများ။
- ကိစ္စများမြောင် လူတို့ဘောင်မှ ရုန်းကန်လှုပ်ရှား ဆုံလည်နွားတို့ တစ်နေ့တာလုပ်ငန်းခွင်အသိမ်း အပန်းပြေငြိမ်းစေဖို့ နှိပ်နယ်ဖေးကူ အားဖြည့်မည့်သူလေးများ။
- အောင်မြင်မှုကို ပိုမိုအရောင်လက် အမြင့်ဆုံးထက် မာနတက်ချိန် မြောက်ကြွားထောင်လွှားရန်အလို့ငှာ ဒီဂျေနဲ့ အရောက်ပို့မယ့် ကချေသည်မလေးများ။
- အားလုံးဆုံးရှုံး ယူကြုံးမရ အပူလုံးကြွချိန် တစ်ယောက်ထည်းတိတ်တိတ် အငုံ့စိတ်ကို ကြိတ်မှိတ်မျိုချ ရင်ကွဲရစဉ် ညည်းသံတိုးတိတ် စိတ်နေငြိမ့်အောင် သာယာစွာကျောသပ် လက်ခံပေးတတ်သူ ဂရုဏာရှင်မလေးများ။
- လုပ်ဖော်ကိုင်ဖက် စီးပွားဖက်အချင်းချင်း ညှိနှိုင်းဖေးကူ ရှိုးပွဲအလှူမှာ သံတမန်အရေး ကူညီပေးမယ့် ချောဆီသူလေးများ။
- နှစ်ယောက်တည်းဘဝ ရိုမန်တစ်ညမှာ မှိန်မှိန်မီးရောင် သော်မှော်ဆောင်ထဲ ပန်းသီးတစ်ကိုက် ဝိုင်တစ်ကျိုက်ဖြင့် ကူညီဖြည့်ဆည်း ယူလာပေးမည့် ဝိတ်တာမလေးများ။
- ခန္ဓာကိုယ်အတွက် အာဟာရအထိုထို မျိုချဖို့အရေး ခံတွင်းမလိုက် နင်နေခိုက်မှာ Excuse me Sir. This is appetizer ပါလို့ ချီးယားစ်လုပ်ပေးရင်း လျှာရင်းမျက်စေသူလေးများ။
- တွေ့ကြုံဆုံကွဲ ဖြစ်မြဲဓမ္မတာ ဆွေသဟာတို့အတွက် ကြိုဆိုနှုတ်ဆက် two pieces ကို ဆင်ယင်ထားသူ လှပျိုဖြူလေးများ။
သူလေးများ…….
သူလေးများ……..
သူလေးများ……..
တို့၏ ဆွဲဆောင်မှုနောက် တကောက်ကောက်လိုက်ပြီး ကျွန်တော် ပျော်ပျော်ကြီး အရက်သောက်ခဲ့တာ နှစ်ပေါင်းသုံးဆယ်လောက်ရှိပြီလို့ ပြောတာပါဗျ 😅😅😅😅😅။
….
….
ခုလည်း အခါလွန်မိုးအေးလေးရဲ့ ငြင်သာအေးမြ တိတ်ဆိတ်မှုန်ရီ မပီ့တပီ ဂီတသံလေးရဲ့ ဆွဲဆောင်မှုအောက်မှာ အရက်သောက်ချင်စိတ်က ပေါ်လာပြန်ပါသကောလားပါဗျာ။
သို့သော်လည်း အရွယ်က ရလာခဲ့ပြီလေ။
သူရာမည်သော သေရည်အရက်ကို အကျွန်ုပ်သည် အငမ်းမရ ဆက်လက်မျိုချနေပါမူ မြစ်ကမ်းပါးအစပ် ချောက်တွင်းနက်၌ ဌာပနာမြှုပ်လိုက်သလို ဩကာသလောကကြီးမှ ပျောက်ကွယ်သွားတော့မည်ဖြစ်ပါသောကြောင့် ဝေးစွာရှောင်ကြဉ်ရတော့မည်ဆိုသည့် အချက်ပေးခေါင်းလောင်းသံလေးများက တီးတိုးတစ်လီ ကျယ်စွာတစ်လှည့် အချက်ပေး မြည်ပြလာကြပါပြီ။
အသက်အရွယ်အရ အရက်သောက်များလို့ သေသွားရတာတဲ့လို့ နှောင်းလူအများက စာရင်းတို့ထားခဲ့ခံရမှာကို ကြောက်စိတ်အရအပြင် ဘတ်ဂျတ်အခြေအနေအရပါ အထက်ပါ တိမ်ပလီနွဲ့နှောင်းတို့၏ မြှူဆွယ်မှုအပေါင်းကို ဆန္ဒသိက္ခာတို့နှင့်ထိန်းပြီး ပြင်းပြင်းထန်ထန်ကြီးကို ဆန့်ကျင်နေပါသည်။
မာယာအလီလီ၊ အပလီတစ်သိန်းကို တောင့်ခံနိုင်ပါသော်လည်း ဆေးမကူပါမူ ညဘက်မှေးစက် အနားယူဖို့ ခက်လှချေသည်တကား။
အရက်နှင့် စိတ်ကိုပြောင်းလဲစေတတ်သော ဆေးဝါးများကို ကျွမ်းကျင်သူ စိတ်အထူးကုဆရာဝန်ကြီးကမူ ကျွန်တော်တစ်ဦးတည်းအတွက် အထူးညွှန်ကြားချက်ကတော့ ဆရာဝန်တို့ပေး အိပ်ဆေးများသည် ခပ်ညံ့ညံ့လေးလို့ အယူလွဲမှား လေလုံးမထွားပါနှင့်တဲ့။
သင့်ပြဿနာက ဆင့်ဖင်ကြီးအထွာ အလွန်ကြီးမားတာမို့ ဆိတ်လောက်ငယ်သေး သာမန်ဆေးနှင့် အမျိုးကောင်းသားသမီးတို့၏ အိပ်စက်ခြင်းသို့ ရောက်ရှိဖို့ရာ မဖြစ်နိုင်ပါတဲ့။
နှစ်ဆယ်ကျော်အစိတ်ပိုင်း အရွယ်တော် တစ်ဆိတ်မဟိုင်းသေးတဲ့ အကိတ်တစ်လိုင်းပိုကဲ အိပ်ပျော်ခြင်းနတ်သမီးနဲ့ တူယှဉ်တွဲနီးနိုင်ဖို့ သာမန်မဟုတ်တဲ့ ဆေးတော်မဟာကို ညအိပ်ရာဝင် သောက်ရပါမည်တဲ့ဗျ။
…
…
အရက်သမားမိတ်ဆွေအပေါင်း ကျန်းမာအသက်ရှည်ကြောင်း ဆုတောင်းမေတ္တာ ပို့သအပ်ပါတယ်ဗျ။
လိုအပ်ခဲ့ရင် စိတ်ကျန်းမာရေး ဆရာဝန်နှင့် ဆွေးနွေးတိုင်ပင်သင့်ပါကြောင်း ကိုယ့်ဘဝအတွေ့အကြုံကိုရင်း၍ ရှေ့မျက်နှာနောက်ထား ထပ်လောင်းပြောကြားပါရစေ…။
အထူးကုဆရာဝန်တစ်ဦး
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
