ကျွန်မတို့ နေထိုင်နေတဲ့ လူ့အဖွဲ့အစည်းမှာ တစ်ဖက်လူ စိတ်မကောင်းဖြစ်မှာစိုးလို့ ဒါမှမဟုတ် အားနာလို့ဆိုတဲ့ အကြောင်းပြချက်နဲ့ “ မျှော်လင့်ချက်အမှား (False Hope)” မျှော်လင့်ချက်ယောင်တွေ ပေးတတ်ကြပါတယ်။
တကယ်တော့ Motivation ပေးတာနဲ့ False Hope ပေးတာဟာ နီးစပ်သယောင်ရှိပေမယ့် ရလဒ်ကတော့ တအားကို ကွာခြားပါတယ်။
တွန်းအားပေးတယ်ဆိုတာ တစ်ဖက်လူရဲ့ ကြိုးစားချင်စိတ်ကို တိုးတက်အောင် အားပေးတာဖြစ်ပြီး၊ မျှော်လင့်ချက်အမှား ပေးတာကတော့ တကယ်မရှိတဲ့ အရာကို အဝေးကနေ လှမ်းပြပြီး လူတစ်ယောက်ကို စမ်းတဝါးဝါး လမ်းလျှောက်ခိုင်းတာနဲ့ တူပါတယ်။
…
…
ကျွန်မ ရှစ်နှစ်သမီးလောက်က အဖေခရီးသွားတိုင်း ငိုယိုပြီး လိုက်ချင်တယ်လို့ ပူဆာတတ်တယ်။ အဖေက “ အိမ်မှာ လိမ်လိမ်မာမာနေရင် စက်ဘီးဝယ်ပေးမယ်” လို့ ကတိပေးလေ့ရှိတယ်။
ကျွန်မက အဖေပြန်လာမယ့်ညနေတိုင်း မျှော်လင့်ချက်တွေနဲ့ စိတ်ကူးတွေနဲ့ အိမ်ရှေ့မှာ စောင့်ခဲ့တာပေါ့ ။ ဒါပေမဲ့ အဖေပြန်လာတဲ့အခါတိုင်း “ နောက်တစ်ခါကျမှ ဝယ်ပေးမယ်” ဆိုတဲ့စကားကိုပဲ ကြားခဲ့ရတယ်။
အကြိမ်ကြိမ်ဖြစ်လာတဲ့အခါ ကျွန်မစိတ်ထဲမှာ “ အဖေပြောတဲ့စကားတွေ အကောင်အထည် မပေါ်ပါလား” ဆိုတဲ့အသိ စွဲသွားခဲ့တယ်။
ဒါဟာ သာမန်ကြည့်ရင် ကလေးတစ်ယောက်ရဲ့ စိတ်ကူးယဉ်မှု ပျက်စီးတာလို့ ထင်ရပေမယ့် တကယ်တော့ လူတစ်ယောက်အပေါ် ထားရှိတဲ့ “ ယုံကြည်မှု (Trust)” အုတ်မြစ် ပျက်သွားတာမျိုးပါ။
အဲဒီနောက်ပိုင်းမှာ ဘယ်သူက ဘယ်လိုကတိပဲပေးပေး ကျွန်မဟာ အလွယ်တကူ မယုံကြည်ရဲတော့ဘဲ အမြဲတမ်း သံသယနဲ့ ကြည့်တတ်တဲ့အကျင့် ပါလာခဲ့ပါတယ်။
ဒါက မြင်သာအောင် ဥပမာပေးတာပါ။
ဒီလိုပါပဲ Relationship တွေမှာလည်း
“ ငါတို့ ရှေ့လျှောက် အဆင်ပြေသွားမှာပါ”
“ ငါ တကယ် ပြောင်းလဲပါ့မယ်” ဆိုတဲ့ စကားတွေဟာလည်း တကယ်လုပ်နိုင်စွမ်းမရှိဘဲ ပြောနေမိခြင်းဟာ တစ်ဖက်လူကို ဒီသံသရာထဲမှာပဲ ချုပ်နှောင်ထားသလိုပါပဲ။
False hope ပေးခံရတဲ့သူဟာ အဲဒီမျှော်လင့်ချက်ကို ဆုပ်ကိုင်ပြီး သူ့ရဲ့အချိန်တွေ၊ ခံစားချက်တွေကို မြှုပ်နှံထားတတ်ကြပါတယ်။
တကယ်ဖြစ်မလာတဲ့အခါ ခံစားရတဲ့နာကျင်မှုက အမှန်တရားကို သိထားရတာထက် ပိုခံစားရဆိုးပါတယ်။
နိုင်ငံရေးမှာဖြစ်ဖြစ်၊ လူမှုရေးမှာဖြစ်ဖြစ် “ မဖြစ်နိုင်တာကို ဖြစ်နိုင်ပါတယ်” လို့ လှည့်ဖျားပြောဆိုတာဟာ ခဏတာ စိတ်သက်သာရာရစေပေမယ့် ရေရှည်မှာတော့ လူထုရဲ့ယုံကြည်မှုကို အသေသတ်လိုက်သလိုပါပဲ။
စိတ်ပညာအရကြည့်ရင်လည်း လူတစ်ယောက်ဟာ အမှန်တရားကို သိလိုက်ရလို့ ခံစားရတဲ့နာကျင်မှုကို ကုစားဖို့လွယ်ကူပေမယ့် ယုံကြည်ပြီးမှ လှည့်ဖျားခံလိုက်ရတဲ့ဒဏ်ရာကို ကုစားဖို့ကတော့ နှစ်နဲ့ချီပြီး ကြာတတ်ပါတယ်။
ဒါကြောင့် ကျွန်မတို့ဟာ တစ်စုံတစ်ယောက်ကို Motivation ပေးချင်တယ်ဆိုရင် “ မင်း ကြိုးစားရင် ဖြစ်နိုင်ခြေရှိတယ်” လို့သာ ပြောပေးပါ။
ဒါပေမဲ့ ကိုယ်တိုင်မသေချာတဲ့ ကတိတွေ၊ ကိုယ်တိုင်မဖြည့်ဆည်းပေးနိုင်တဲ့ မျှော်လင့်ချက်တွေကိုတော့ စေတနာအမှားနဲ့ မပေးမိဖို့ အင်မတန်အရေးကြီးပါတယ်။
ကလေးငယ်တွေကိုလည်း “ ကလေးပဲ မသိဘူး” လို့ မသတ်မှတ်ပါနဲ့။ သူတို့ဟာ ကတိကဝတ်ကို လူကြီးတွေထက် ပိုတန်ဖိုးထားတတ်ကြသူတွေပါ။
ကိုယ် မပေးနိုင်ရင် အစကတည်းက ငြင်းပါ။ ကတိပေးပြီးရင်တော့ တည်အောင်ကြိုးစားပါ။
False Hope က လူတစ်ယောက်ကို ခဏတာ စိတ်ကူးယဉ်အိပ်မက်ထဲ ပို့လိုက်သလိုနဲ့ ဆင်တူပြီး Motivation ကတော့ အိပ်မက်ထဲကနေ နိုးထပြီး လက်တွေ့လျှောက်လှမ်းနိုင်အောင် ဖေးမပေးတာမျိုး ဖြစ်ပါတယ်။
အမှန်တရားဟာ တစ်ခါတလေမှာ ခါးသီးနိုင်ပေမယ့် မျှော်လင့်ချက်အမှားလိုတော့ လူတစ်ယောက်ရဲ့ယုံကြည်မှုကို အပြီးသတ် မဖျက်ဆီးနိုင်ပါဘူး။
ဒါကြောင့် ကိုယ်တိုင်မဖြည့်ဆည်းပေးနိုင်တဲ့ မျှော်လင့်ချက်တွေကို စေတနာအမှားနဲ့ မပေးမိဖို့က ပိုအရေးကြီးပါတယ်…..။
သင်၏စိတ်ကလေး ကျန်းမာစေဖို့
ဒေါက်တာမီ
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
