” ခြေသည်းလက်သည်းမှိုစွဲခြင်း “

ခြေသည်းလက်သည်းမှိုစွဲတာဟာ အဖြစ်များတဲ့ပြဿနာတစ်ခုပါ။ ဘက်တီးရီးယားနဲ့အတူ မှိုကလည်းလူ့ခန္ဓာကိုယ်တိုင်းမှာ ကပ်တွယ်ပါရှိနေပြီး ပုံမှန်အတိုင်းဆိုရင်တော့ အန္တရာယ်မပေးပါဘူး။ ဒါပေမယ့် တစ်နေရာတည်းမှာ အများကြီးစုလာရင်တော့ ဒုက္ခပေးပါတော့တယ်။

လက်သည်းခြေသည်းမှာ မှိုစွဲတာကို ဆေးပညာအရတော့ ‘Onychomycosis’လို့ ခေါ်ပါတယ်။

ဘာလို့ မှိုစွဲရတာလဲ?

မှိုက လက်သည်းခြေသည်းရဲ့အထဲ ၊ အောက် (သို့) အပေါ်မှာ စုပုံလာလို့ပါ။ မှိုတွေက ပူနွေးစိုစွတ်တဲ့ပတ်ဝန်းကျင်မှာ အပေါက်များကြပါတယ်။ ခြေသည်းနဲ့လက်သည်းဆို ခြေသည်းမှာ ပိုအဖြစ်များကြပါတယ်။

– ကိုယ့်ခန္ဓာကိုယ်မှာ နဂိုရှိပြီးသားမှိုတွေ များစွာစုလာ (သို့) ပေါက်လာတာ

– သူများဆီက မှိုကူးတာ

– ရှုးဖိနပ်အဝတ်များတာ

– ခြေသည်းလက်သည်း အလှပြင်တဲ့နေရာတွေက အသုံးပြုတဲ့ပစ္စည်းတွေကတစ်ဆင့် ကူးတာ

– လက်သည်းညှပ် ခြေသည်းညှပ်တွေကတဆင့် ကူးတာ…ဒီလိုနည်းလမ်းတွေနဲ့ ရောဂါဖြစ်ပွားကူးစက်နိုင်ပါတယ်။

ဘယ်လိုလူတွေမှာ ပိုအဖြစ်များနိုင်သလဲ?

ဆီးချိုရှိသူများ

သွေးလည်ပတ်မှု မကောင်းသူများ

အသက်၆၅နှစ်အထက်

ခြေသည်းတု လက်သည်းတု တပ်ဆင်သူများ

အများပိုင်ရေကူးကန် အသုံးပြုသူများ

လက်သည်းခြေသည်း ဒဏ်ရာရသူများ

ရေအထိများသူများ

လက်အိတ်ခြေအိတ် အမြဲဝတ်သူများ

ကိုယ်ခံအားနည်းသူများ

အမျိုးသားနဲ့အမျိုးသမီးမှာ အမျိုးသားတွေက ပိုအဖြစ်များကြပါတယ်။ ကလေးနဲ့လူကြီးမှာလည်း လူကြီးတွေက ပိုအဖြစ်များကြပါတယ်။

ခြေသည်းလက်သည်းမှိုစွဲခြင်းရဲ့လက္ခဏာတွေကဘာတွေလဲ?

ပထမဖြစ်ဖြစ်ချင်းဆို ခြေသည်းလက်သည်းအောက်မှာ အဖြူ(သို့)အဝါကွက်လေးတွေ တွေ့ရပါတယ်

ကြာလာရင် လက်သည်းခြေသည်းတစ်ခုလုံး အဖြူ ၊ အဝါ ၊ အစိမ်းရောင် (သို့) အမဲရောင်ပြောင်းသွားပါတယ်

ခြေသည်းလက်သည်းဟာ ထူလာပြီး ညှပ်ဖို့ခက်လာတတ်ပါတယ်

တဖြည်းဖြည်းလန်လာပြီး အသားမှ ကွာစပြုလာပါတယ်

ခြေသည်းလက်သည်း တုံးလာတာ

အနံ့အသက် မကောင်းတာမျိုးတွေ ဖြစ်တတ်ပါတယ်

လက္ခဏာတွေက ကိုယ်ဘယ်လိုမှိုအများအစား ကူးစက်တယ်ဆိုတာပေါ်မူတည်ပြီး အမျိုးမျိုးပြောင်းနိုင်ပါတယ်။ အစမှာမပြင်းထန်ပေမယ့် တစ်ချို့ခြေချောင်းလေးတွေမှာ မှိုစွဲတာပြင်းထန်ရင် လမ်းမလျှောက်နိုင်တဲ့ထိ ဖြစ်တတ်ပါတယ်။

မှိုစွဲခြင်းအမျိုးအစားများ

ခြေသည်းလက်သည်းအဖျားပိုင်း မှိုစွဲခြင်း

အဖြစ်အများဆုံးဖြစ်ပြီး ခြေသည်းလက်သည်းထိပ်လေးမှာ ချွန်ချွန်ကြမ်းကြမ်းပုံလေး ဖြစ်နေတတ်ပါတယ်။ ခြေသည်းလက်သည်းပေါ်မှာလည်း အဖြူစင်းတွေ တွေ့ရတတ်ပါတယ်။ ခြေသည်းလက်သည်းအပါအဝင် အောက်အရေပြားပါ ကူးစက်တတ်ပါတယ်။

ခြေသည်းလက်သည်းအပေါ်ယံလွှာ မှိုစွဲခြင်း

ခြေသည်းမှာ အများဆုံးဖြစ်တာပါ။ အပေါ်ယံလွှာကို တိုက်ခိုက်ပြီး ခြေသည်းပေါ်မှာ အဖြူကွက်လေးတွေတွေ့ရပါတယ်။ နောက်ပိုင်း ခြေသည်းတစ်ခုလုံးပျံ့သွားပြီး ခြေသည်းလန်သွားတတ်ပါတယ်။

ခြေသည်းလက်သည်းအရင်းပိုင်း မှိုစွဲခြင်း

ခြေသည်းလက်သည်းအရင်းပိုင်းမှာ အဝါကွက်လေးတွေ စပြီးပေါ်တတ်ပါတယ်။ တဖြည်းဖြည်းနဲ့ တစ်ခုလုံးပျံ့သွားပါတယ်။ ကိုယ်ခံအားနည်းတဲ့သူတွေမှာ အဖြစ်များပြီး ဒဏ်ရာရတာကနေလည်း ဖြစ်တတ်ပါတယ်။

Candida yeats ကြောင့်ဖြစ်သောမှိုစွဲခြင်း

နဂိုဒဏ်ရာရ (သို့) ပိုးတစ်ခုခုဝင်နေတဲ့ခြေသည်းလက်သည်းကို Candidaလို့ခေါ်တဲ့ မှိုတစ်မျိုးကူးစက်လို့ဖြစ်တာပါ။ လက်သည်းမှာ ပိုအဖြစ်များပါတယ်။ ရေထဲလက်ခဏခဏနှစ်ဆေးရသူတွေမှာ ပိုဖြစ်တတ်ပါတယ်။

ဘယ်လိုကုသကြမလဲ?

မိမိမှာ လက်သည်းခြေသည်းမှိုစွဲတယ်လို့ သံသယရှိရင် ဆရာဝန်နှင့်ပြသပါ။ မြန်မြန်မပျောက်ပါ။ ရေရှည်ကုသရပါမယ်။

နောက်ဆက်တွဲ ဘာတွေဖြစ်နိုင်လဲ?

မကုသဘဲ တစ်နှစ်နဲ့အထက်ဖြစ်နေသူတွေက နောက်ဆက်တွဲပြဿနာတွေအနေနဲ့

– မှိုခဏခဏပြန်ဖြစ်တာ

– လက်သည်းခွံ လုံးဝကျွတ်သွားတာ ၊ အရောင်လုံးဝပြောင်းသွားတာ

– ခန္ဓာကိုယ်ရဲ့တခြားနေရာတွေပါ မှိုကူးသွားတာမျိုးတွေ ဖြစ်တတ်ပါတယ်

*** ဆီးချိုရောဂါရှိတဲ့သူတွေ မှိုစွဲရင် ပိုသတိထားသင့်ပါတယ်။ အရေပြားပါ ပြင်းပြင်းထန်ထန်ကူးစက်တတ်ပါတယ် ***

မှိုမစွဲအောင် ဘယ်လိုကာကွယ်ရမလဲ?

• လက်နဲ့ ခြေထောက်ကို ပုံမှန်ဆေးပါ။ ဆပ်ပြာအသုံးပြုပြီး လက်သည်းကြား ခြေသည်းကြားပါမကျန် ဆေးပါ။

• လက်သည်းခြေသည်း ပုံမှန်ညှပ်ပါ

• ခြေဖဝါးချွေးထွက်များရင် ခြေအိတ်ကို တစ်ရက်တစ်ကြိမ် (သို့) နှစ်ကြိမ်လဲပေးပါ။ ဖြစ်နိုင်ရင် ရှုးဖိနပ်ပါချွတ်ပြီး ချွေးတိတ်တဲ့အထိ အခြောက်ခံပေးပါ။