မနေ့တစ်နေ့ကမှ Trump အစိုးရက အသစ်ထုတ်ပြန်လိုက်တဲ့ အစားအသောက်ပုံစံပိရိမစ်ကို လူပြောများနေကြလို့ သိချင်နေကြမယ်ထင်ပါတယ်။
တကယ်တော့ food pyramid ဆိုတာ စားသောက်သင့်တဲ့ပုံစံကို ပုံလေးတစ်ပုံထဲမှာ အနှစ်ချုပ်ဖော်ပြထားတဲ့ ညွှန်းဆိုချက်ပါ။ Trump အစိုးရကတော့ သူ့ရဲ့မူဝါဒအတိုင်း အရာရာကို ပြန်စိစစ်ပြီး မလိုအပ်တဲ့ ဝန်ထုပ်ဝန်ပိုးတွေ လျှော့ချနိုင်အောင်၊ တိုင်းပြည်ဘဏ္ဍာ အလဟာသမဖြစ်အောင် ရည်ရွယ်ပြီး နာတာရှည်ရောဂါတွေ၊ ဆီးချို၊ သွေးတိုး၊ အဝလွန် ရောဂါတွေ ဖြစ်နှုန်းကျလာအောင် စားသောက်နေထိုင်ပုံကို ပြင်သင့်ပြီလို့ မီးမောင်းထိုးပြလိုက်ပါတယ်။
ဘာလို့ဆို သူတို့ဆီမှာ အသက် ၁၂ ကနေ ၁၇ အရွယ်လူငယ် ၃ ယောက်မှာ ၁ ယောက်က ဆီးချိုအကြိုအဆင့် ဖြစ်နေပါတယ်တဲ့။ နောက်ပြီး အမေရိကန်တွေရဲ့ ၇၀% က အဝလွန်ရောဂါ ခံစားနေကြရပါသတဲ့။ ဒီတော့ ရိုးရှင်းစွာနဲ့ ကြေညာလိုက်ပါတယ် “စစ်မှန်တဲ့ အစားအစာကို စားကြပါ” တဲ့။
စာရေးသူ နားလည်လိုက်တာကတော့ တို့တွေ အာရှမှာလို ဟင်းတစ်ခုကို စားခါနီးမှ အချစ်တွေ ထည့်ချက်ကြတာမဟုတ်ဘဲ ဘဝကို ရုန်းကန်ရတာတွေများတော့ အရာရာဟာ လုပ်ပြီးသား၊ ခဲပြီးသား၊ စက်ရုံထွက်ပြီးသား ဖြစ်နေကြတယ်မို့လား။ ဒီတော့ အစားအစာတွေက အာဟာရဓာတ်နည်းပါးပြီး ကယ်လိုရီကျ များနေတယ်။ အကျိုးဆက်အနေနဲ့ အဝလွန်မယ်၊ နောက်ဆက်တွဲတွေ လာမယ်ပေါ့လေ။ ခြံဘေးက အရွက်လေးကို ချဉ်ဟင်းလေးလုပ်၊ ဖမ်းလာတဲ့ ငါးလေးတွေနဲ့ချက်၊ ပူပူနွေးနွေးစား ဒါမျိုးဘဝရဲ့ အရသာမရှိလေခြင်းလို့ စာနာမိပါတယ်။
…
…
ဆက်ရမယ်ဆိုရင် US food pyramid မှာပါတဲ့ အချက်တွေထဲမှာ သိသိသာသာ ပြောင်းလဲသွားတာကတော့ အသားဓာတ်ပါ။ အရင်က အများဆုံးစားဖြစ်တာက ဆန်ဂျုံပြောင်း အုပ်စုဖြစ်ပြီး အခုအခါမှာတော့ သူကဟိုးအောက်ကို ရောက်သွားပါတယ်။
အသားဓာတ်ကို ယခင်က စားတာထက်ကို ပိုစားဖို့ တိုက်တွန်းလိုက်ပါတယ်။ ပေါင် ၁၅၀ ဝန်းကျင်ရှိတဲ့သူတစ်ယောက်ဟာ အသားဓာတ် ၉၀/၁၀၀ ဂရမ်လောက် စားပေးရပါမယ်တဲ့။ ကြက်ပေါင် ၄/၅ တုံးခန့်ကို ပြောတာပါ။ (အရင်ကဆို ၆၀ ဂရမ် ခန့်ပေါ့)
ကောက်နှံအုပ်စုမှာလည်း ၂-၄ ခါ ပြင်စာလောက်ဆိုတာ အရင်ထက် ထက်ဝက်ကျော်နည်းသွားပါတယ်။ မြင်သာအောင်ပြောရရင် တစ်နေ့လုံးမှာမှ ထမင်း ၁၀ ဇွန်းကနေ ဇွန်း ၂၀ လောက်တဲ့။ ဒီပမာဏက ပေါင်မုန့်တို့ အခြားဟာတွေ မပါမှနော်။ ဥပမာ ပေါင်မုန့်တစ်ချပ်စားရင် ထပ်စားလို့ရတာက ထမင်း ၁၀ ဇွန်းပေါ့။ နောက်ထပ် အီကြာကွေး ပလာတာ ဘာမှမရတော့ဘူး။ နောက်ပြီး ပေါင်မုန့်အဖြူလိုဆိုရင် တားတဲ့နီးပါးပဲ။ ဆန်လုံးညို၊ ပေါင်မုန့်ကြမ်းတို့လို့ အခွံကြမ်းမဖွတ်ထားတာကိုမှစားဖို့ တိုက်တွန်းလိုက်ပါတယ်။
နွားနို့မှာတော့ အရင်က အဆီထုတ်နွားနို့ကို ညွှန်ခဲ့ပေမယ့် အခုအခါမှာတော့ အဆီပါတဲ့ full cream နို့ကို သောက်ပါတဲ့။ ဒိန်ချဉ်၊ နွားနို့တို့ကိုပေါင်းရင် တစ်နေ့ ၃ ခွက်လောက် သောက်သင့်ပါသတဲ့။
သကြားဖြတ်၊ ဆားလျှော့ ဘာညာကတော့ အရင်လိုပါပဲ။
လတ်ဆတ်တဲ့ အစားအစာတွေက ရှေ့ရောက်လာပြီး မုန့်ထုပ်တွေ၊ အာလူးကြော်တွေ၊ readymade ကို မစားဖို့တိုက်တွန်းပါတယ်။
ဟင်းသီးဟင်းရွက် များများစားဖို့အပြင် အူလမ်းကြောင်း ကျန်းမာရေးအတွက် အချဉ်တည်ထားတဲ့ ဟင်းရွက်ချဉ်တွေ၊ ကင်ချီလိုတွေကိုတော့ အထူးတလည် အရေးပေးလာပါတယ်။
အသီးဆိုရင်လည်း ငှက်ပျောသီး တစ်နေ့တစ်လုံး လောက်စား၊ အချိုရည်တွေ အသီးဖျော်ရည်တွေ မသောက်နဲ့လို့ ဆိုပါတယ်။
…
…
ပွင့်ပွင့်လင်းလင်းပြောရရင် အသားဓာတ်တိုးဖို့နဲ့ ဆန်လျှော့ရမှာက တို့မြန်မာတွေအနေနဲ့ မဖြစ်နိုင်တဲ့ပမာဏလို ဖြစ်နေပါတယ်။
မြန်မာပြည်အနေအထားနဲ့ သူတို့ ညွှန်းဆိုချက်က အလုံးစုံကိုက်ရဲ့လားဆိုရင် မကိုက်ညီနေဘူးလို့ ပြောပါရစေ။ အမေရိကန်ရောက် မြန်မာတွေအတွက်တော့ လိုက်နာသင့်ပါတယ်။ နောက်ပြီး အမေရိကန်နဲ့ လူနေမှု အဆင့်အတန်း ပုံစံတူတဲ့ ဒေသမှာဆိုရင်တော့ အတိအကျ လိုက်နာသင့်ပါတယ်။
…
…
ပိုလက်တွေ့ကျတဲ့ အကြံပြုချက်အနေနဲ့ ယူသင့်တာယူ ပြင်သင့်တာပြင်ကြမလား။
အသားဓာတ်ကို ပိုစားသင့်တယ်ဆိုတဲ့ အကြံပြုချက်အတိုင်း မိမိနေထိုင်ရာဒေသမှာ ရနိုင်တဲ့ အသားငါး၊ ပုစွန်၊ ပင်လယ်စာအမျိုးမျိုး၊ ကြက်ဥနဲ့ ဥအမျိုးမျိုး၊ ပဲအမျိုးမျိုး၊ တိုဖူး (ပဲပုပ်)၊ မြေပဲ၊ နှမ်းတို့လို အစားအစာတွေအပြင် အစေ့အဆန်အမျိုးမျိုး၊ နို့နဲ့ နို့ထွက်ပစ္စည်းတွေကနေ ပရိုတင်းဆိုတဲ့ အသားဓာတ်ကို ရရှိနိုင်ပါတယ်။ ဒါပေမယ့် ပရိုတင်းဖြစ်ပြီးရော ဆိုတာထက် အရည်အသွေးကောင်းတဲ့ ပရိုတင်းတွေဖြစ်ဖို့ အစာအုပ်စုစုံဖို့ ပိုအကြံပြုချင်ပါတယ်။
ဘာလို့ဆို ပြည့်ဝဆိီကို တစ်နေ့တာကယ်လိုရီရဲ့ ၁၀ ရာနှုန်းထက် မကျော်ပါနဲ့လို့ သူတို့ပဲ အကြံပြုထားတာမို့ပါ။ တကယ်လို့ အဆီများတဲ့ အသားအနီတွေ၊ ဝက်ဂုတ်သားတို့ အခေါက်တို့လိုဆိုရင် ပရိုတင်းများများရဖို့ စားလေလေ ပြည့်ဝဆီများများရလေ ဖြစ်မှာပါ။ ဒါကြောင့် အဆီနည်းတဲ့ အသားတွေဖြစ်တဲ့ ကြက်ဥအကာ၊ ပင်လယ်စာ၊ ကြက်ရင်ဘုံသားလိုမျိုးတွေရယ် ဆီပါပေမယ့် ကောင်းမွန်တဲ့ မပြည့်ဝဆီဖြစ်တဲ့ ငါးကရတဲ့အဆီလိုမျိုး၊ အစေ့အဆန်တွေဆိုရင် အသားဓာတ်ရော အဆီဓာတ်ရောမျှတပြီး ဗီတာမင် သတ္တုဓာတ်တွေကြွယ်ဝလို့ ကောင်းပါတယ်။
သူတို့သုံးတဲ့ သံလွင်ဆီအစား မြေပဲဆီအစစ်ဆိုရင်လည်း ပိုဖြစ်နိုင်မယ့်အရာလို့ မြင်မိပါတယ်။ (monounsaturated oil ချင်း ဆင်တာမို့ပါ)
Food pyramid အသစ်ထဲ ထွေထူးမပါပေမယ့် တို့တွေအတွက် အဖိုးတန် ပဲအမျိုးမျိုး၊ အထူးသဖြင့် ပဲပိစပ်ဆိုရင် အသားနဲ့ထပ်တူနီးပါး အသားဓာတ်ပါဝင်တာမို့ အလွန်ကောင်းပါတယ်။ ဒေသထွက်ပဲတွေဆိုရင်လည်း ရတဲ့ပဲ ၂ မျိုး ၃ မျိုးသာရောချက် အသားလိုမျိုး ပရိုတင်း ပြည့်ဝစွာရစေပါတယ်။
US food pyramid ဟာ သူတို့ဒေသမှာလုပ်တဲ့ သုတေသနအချက်အလက်တွေကို အခြေခံထားလို့ ကျွန်မတို့ဒေသမှာ ရရှိနိုင်တဲ့ အစားအသောက်တွေနဲ့ ကွာဟနေမှာပါ။ သိပ္ပံတွေ့ရှိချက်တွေဆိုတာကလည်း အချိန်နဲ့အမျှ ပြောင်းလဲနိုင်တာမို့ မိမိရဲ့လက်တွေ့ဘဝ မှာ အဆင်ပြေဆုံးဖြစ်အောင်ရယ်၊ ကျန်းမာတဲ့ ဘိုးဘေးဘီဘင်တွေရဲ့ စားသောက်ပုံစံလေးတွေရယ်ကို မျှတစွာပြင်ဆင်ယူကာ အသိသတိနဲ့ ချင့်ချိန်စားသောက်ခြင်းသာ အကောင်းဆုံးဖြစ်ပါတယ်လို့ အကြံပြုလိုပါတယ်….။
အာဟာရဆရာဝန်တစ်ဦး
Telekyanmar
Reference : 📖
https:// cdn. realfood. gov/ DGA. pdf
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
