ဒဏ်ရာချင်း မယှဉ်ပြိုင်ကြေး
——————-
ကျွန်မတို့ရဲ့ နေ့စဉ်ဘဝ စကားဝိုင်းတွေထဲမှာ အမှတ်မထင် မှားယွင်းတတ်တဲ့ အလေ့အကျင့်လေးတစ်ခု ရှိပါတယ်။
တစ်စုံတစ်ယောက်က သူ့ရဲ့အခက်အခဲ ဒါမှမဟုတ် ပင်ပန်းမှုတွေကို လာရောက်ရင်ဖွင့်တဲ့အခါ ကိုယ်တွေက “ အို… ဒါက ဘာဟုတ်သေးလို့လဲ၊ ငါ့တုန်းကဆိုရင် ဒီထက်တောင် ဆိုးသေးတာ၊ ငါဆိုရင်လေ…” လို့ အစချီရင်း ကိုယ့်ဒဏ်ရာကို ထုတ်ပြပြီး ပြန်ပြိုင်မိတတ်တာမျိုးပါ။
တကယ်တော့ ဒါဟာ နှစ်သိမ့်မှုထက် တစ်ဖက်လူရဲ့ခံစားချက်ကို အသိအမှတ်မပြုတာ၊ အရေးတယူမပြုတာ (Invalidation) မျိုး ဖြစ်သွားတတ်ပါတယ်။
စိတ်ပညာမှာတော့ ဒါကို Conversational Narcissism လို့ ခေါ်ပါတယ်။ စကားပြောကြတဲ့အခါ ကိုယ့်ကိုယ်ကိုယ်သာ ဗဟိုပြုပြီး စကားဝိုင်းရဲ့ အာရုံစိုက်မှုကို ကိုယ့်ဆီ အတင်းဆွဲယူလိုက်တာမျိုးကို ဆိုလိုတာပါ။
ကိုယ့်ဘက်ကတော့ “ ငါတောင် ကျော်ဖြတ်နိုင်ခဲ့တာပဲ၊ မင်းလည်း လုပ်နိုင်မှာပါ” ဆိုတဲ့ စေတနာနဲ့ အားပေးတာ ဖြစ်နိုင်ပေမယ့် တစ်ဖက်လူမှာတော့ “ ငါ့ဒုက္ခက ပြောပလောက်စရာ မရှိဘူးလား” ဆိုတဲ့ အားငယ်စိတ်နဲ့ အတူ
” ငါ့ကို နားမလည်ပေးဘူး” ဆိုတဲ့ အထီးကျန်စိတ်ကိုသာ ခံစားသွားရနိုင်ပါတယ်။
…
…
ဒါဆို ဒီလိုမဖြစ်အောင် ဘယ်လိုသတိပြုကြမလဲ။
🫂 ပင်ပန်းမှုကို ပေတံနဲ့ မတိုင်းပါနဲ့။
လူတစ်ယောက်ရဲ့ ခံနိုင်ရည် (Resilience) ဟာ တစ်ဦးနဲ့တစ်ဦး မတူညီကြပါဘူး။ ကိုယ့်အတွက် သေးငယ်တဲ့အရာက တစ်ဖက်လူအတွက် လောကကြီးပျက်စီးမတတ် ပင်ပန်းနေနိုင်ပါတယ်။ သူ့ခံစားချက်ဟာ သူ့အတွက်တော့ အစစ်အမှန်ဖြစ်နေတာကို အသိအမှတ်ပြုပေးဖို့ လိုပါတယ်။
.
🫂 ကိုယ့်အတွေ့အကြုံကို ခဏဘေးဖယ်ထားပါ။
သူ ရင်ဖွင့်နေချိန်မှာ ကိုယ့်အကြောင်းတွေကို ခဏသိမ်းထားလိုက်ပါ။ သူ လိုအပ်နေတာက အဖြေတစ်ခု မဟုတ်သလို ကိုယ့်ရဲ့ အတိတ်က အောင်နိုင်မှုတွေလည်း မဟုတ်ပါဘူး။ “ မင်း တော်တော် ပင်ပန်းနေမှာပဲနော်” ဆိုတဲ့ စာနာမှုအပြည့်ရှိတဲ့ နားတစ်စုံကိုပဲ မျှော်လင့်ကြတာဖြစ်ပါတယ်။
.
🫂 အချိန်ပေးပြီးမှ မျှဝေပါ။
ကိုယ့်အတွေ့အကြုံကို ပြောပြချင်ရင်တောင် သူ့ဘက်က အပူတွေ နည်းနည်းငြိမ်းသွားပြီး သူကိုယ်တိုင်အဖြေရှာဖို့ အဆင်သင့်ဖြစ်ပြီဆိုမှ “ ငါလည်း ဒီလိုမျိုး ကြုံဖူးတယ်။ အဲတုန်းကတော့…” ဆိုတဲ့ ပုံစံမျိုးနဲ့ မျှဝေတာကသာ ပိုပြီးသင့်တော်တဲ့ဖေးမမှု ဖြစ်နိုင်ပါတယ်။
…
…
လူတစ်ယောက်က ကိုယ့်ကို ရင်ဖွင့်တယ်ဆိုတာ သူ့ဘဝရဲ့ အားနည်းချက်ကို ယုံယုံကြည်ကြည်နဲ့ ပုံအပ်လိုက်တာပါ။ အဲဒီယုံကြည်မှုကို ဒဏ်ရာချင်းယှဉ်ပြိုင်ခြင်းနဲ့ မတုံ့ပြန်လိုက်ပါနဲ့။
နှစ်သိမ့်ပေးတယ်ဆိုတာမှာ တစ်ဖက်လူရဲ့အပူကို ကိုယ့်ရဲ့စာနာမှုနဲ့ စိတ်ပါလက်ပါ နားထောင်ပေးခြင်းသာ ဖြစ်ပါစေ။
ဒီတစ်ခေါက်တော့ သူ့ရဲ့စိတ်အပူကိုပဲ သေချာလေးကူပြီး ငြိမ်းသတ်ပေးလိုက်ကြရအောင်လားရှင်….။
သင်၏စိတ်ကလေး ကျန်းမာစေဖို့
ဒေါက်တာမီ
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
