တယ်လီကျန်းမာအဖွဲ့အစည်း

တယ်လီကျန်းမာ အဖွဲ့အစည်း

တယ်လီကျန်းမာ အွန်လိုင်းဆေးခန်းက ကြိုဆိုပါသည်။

တယ်လီကျန်းမာသည် ကျန်းမာရေး၀န်ကြီးဌာန၊ အမျိုးသားညီညွတ်ရေးအစိုးရ၏ ကုသရေးအဖွဲ့ အစည်းအနေဖြင့် ပြည်သူလူထု၏ ကျန်းမာရေးစနစ်ကို အထောက်အပံ့ပေးနိုင်ရန် ဖွဲ့စည်းထားခြင်းဖြစ်ပါသည်။

မြန်မာပြည်သူလူထုအား အကောင်းမွန်ဆုံး ကျန်းမာရေး၀န်ဆောင်မှုများ ပေးနိုင်ရန်၊ ဖက်ဒရယ် ကျန်းမာရေးစနစ် ပိုမိုကျယ်ပြန့်စွာ အားကောင်းစေရန်နှင့် ကျန်းမာရေးအသိပညာ မြင့်မားစေရန်တို့သည် ကျွန်ုပ်တို့၏ မျှော်ရည်ချက်ဖြစ်ပါသည်။

မိမိတို့အဖွဲ့အစည်းသည် ကျန်းမာရေးစောင့်ရှောက်မှုကို အကောင်းမွန်ဆုံးပေးအပ်နိုင်ရန် အစဉ်အမြဲကြိုးစားလျက် ရှိပါသည်။ မိိမိတို့အဖွဲ့အစည်းသည် ပြည်တွင်း အနယ်နယ်အရပ်ရပ်နှင့် နိုင်ငံတကာမှ မြန်မာပြည်ဖွား အရည်အချင်းပြည့်၀သော ကျန်းမာရေးစောင့်ရှောက်မှုပေးသူများနှင့် ဆရာ၀န်များဖြင့် ဖွဲ့စည်းထားခြင်း ဖြစ်ပါသည်။ ဆွေးနွေးပြသနိုင်သော ဆေးခန်းများကိုလည်း လိုအပ်ချက်အရ ချဲ့ထွင်ထားကာ ယခုတွင် အထွေထွေ ရောဂါများသာမက၊ အထူးကုဆေးခန်းများနှင့် စိတ်လူမှုအရေးပေါ်ဖေးမနိုင်ရန် ရင်ဖွင့်ရာဆေးခန်းများလည်း ဖွင့်လှစ်ထားလျက်ရှိပါသည်။

လူနာများကို ဆေးရုံဆေးခန်းများသို့ တကူးတက သွားရောက်ပြီး တန်းစီရန် မလိုစေဘဲ အရည်အသွေးပြည့်၀သော ကျန်းမာရေးစနစ်တစ်ခုကို အတားအဆီးနည်းပါးစွာဖြင့် နည်းပညာအသုံးပြုကာ လက်တစ်ကမ်းအလိုမှ ရရှိနိုင်စေရန် ရည်ရွယ်ပါသည်။

လူနာများ၏ ကျန်းမာရေးအချက်အလက်များ လုံခြုံစေရေးနှင့် ကျင့်၀တ်နှင့်ညီညွတ်မှု၊ အသားအရောင်၊ လူမျိုး၊ ဘာသာ ကွဲပြားမှုမရှိစေဘဲ လူ့အခွင့်အရေးတန်းတူညီမျှရရှိရေးကို မိမိတို့၏ အသက်သွေးကြောသဖွယ် တန်ဖိုးထားပါသည်။

တရား၀င် ကုသရေးအဖွဲ့အစည်းအနေဖြင့် လူထုကို ၀န်ဆောင်မှုပေးရသည့်အတွက်လည်း အထူးပင် ဂုဏ်ယူမိပါသည်။ တယ်လီကျန်းမာကို ချစ်ချင်လေးစားမှု၊ ယုံကြည်အားကိုးမှု၊ ရွေးချယ်ပေးမှုတို့အတွက် အထူးကျေးဇူးတင်လိုပါသည်။

တယ်လီကျန်းမာ၏ ကျန်းမာရေးဝန်ဆောင်မှုများအကြောင်း အကျဥ်းချုပ်

(Overall Services)

တယ်လီကျန်းမာသည် စေတနာ့ဝန်ထမ်း ၃၅၀ ကျော်ဖြင့် ပါဝင်ဖွဲ့စည်းထားပြီး မြန်မာနိုင်ငံတစ်ဝန်းလုံးနှင့် ကမ္ဘာအရပ်ရပ်ရှိ ပြည်ပရောက်မြန်မာလူမျိုးများအတွက် အွန်လိုင်းမှတစ်ဆင့် ကျန်းမာရေးဝန်ဆောင်မှုများ ပေးအပ်လျက်ရှိပါသည်။ အဆိုပါ ကျန်းမာရေး၀န်ဆောင်မှုများတွင် အခြေခံကျန်းမာရေး စောင့်ရှောက်မှုများ၊ အထူးကုရောဂါအလိုက် ဆွေးနွေးကုသမှုများ၊ သွားနှင့်ခံတွင်း၊ အိတ်စ်အိုင်ဗွီ (HIV)၊ တီဘီ (TB)၊ စိတ်ကျန်းမာရေး ဝန်ဆောင်မှုများအပြင် မိမိကိုယ်ကိုယ် သေကြောင်းကြံစည်မှု ကာကွယ်တားဆီးရေး အရေးပေါ်ဝန်ဆောင်မှု ဟော့လိုင်းချန်နယ် (Zero Suicide Hotline) တို့ ပါဝင်ပါသည်။ ထို့ပြင် လူမှုကွန်ရက်စာမျက်နှာများမှတစ်ဆင့် ကျန်းမာရေးပညာပေး အကြောင်းအရာနှင့် အစီအစဉ်များကိုလည်း တင်ဆက်ပေးလျက် ရှိပါသည်။ ဘေးကင်းပြီး လက်လှမ်းမီနိုင်သည့်အပြင် လူထုကို ဗဟိုပြုသော ကျန်းမာရေးစောင့်ရှောက်မှုများ ပေးနိုင်ရန်အတွက်လည်း စဥ်ဆက်မပြတ် ဆေးပညာသင်ကြားလေ့လာမှု သင်တန်းများ၊ ဌာနတွင်းစစ်ဆေးမှုများနှင့် လူထု၏ တုံ့ပြန်အကြံပြုချက်များမှတစ်ဆင့် ဝန်ဆောင်မှုအရည်အသွေး မြှင့်တင်သည့် လုပ်ငန်းများကို စဉ်ဆက်မပြတ် ဆောင်ရွက်လျက်ရှိပါသည်။

အထွေထွေ ကျန်းမာရေးဆေးခန်းများ (Primary Clinics)

အများပြည်သူ၏ အခြေခံကျန်းမာရေး စောင့်ရှောက်မှုနှင့် ဆေးဝါးကုသမှု လုပ်ငန်းများအတွက် တယ်လီကျန်းမာတွင် အထွေထွေ ကျန်းမာရေးဆေးခန်း (Primary Clinics) ၁၃ ခုဖြင့် နေ့စဥ် ဆောင်ရွက်ပေးလျက်ရှိပါသည်။ ဆေးဘက်ဆိုင်ရာ စေတနာ့ဝန်ထမ်း ၁၃၀ ကျော်၏ အကူအညီဖြင့် ဤဆေးခန်းများသည် နေ့စဥ် နံနက် ၈ နာရီမှ ည ၁၀ နာရီအထိ လည်ပတ်ဆောင်ရွက်လျက် ရှိပါသည်။ ဝန်ဆောင်မှုများအနေဖြင့် အထွေထွေဆေးခန်းများ၊ သွားနှင့်ခံတွင်းဆေးခန်းများ၊ HIV ဆေးခန်းနှင့် တီဘီ (Tuberculosis) ဆေးခန်းတို့ ပါဝင်ပြီး ဤဆေးခန်းများသည် နေ့စဉ် လူနာ ၈၀ နီးပါးကို ကျန်းမာရေးစောင့်ရှောက်မှုများ ပေးအပ်လျက်ရှိနေပါသည်။

အထူးကုဆေးခန်းများ (Specialist Clinics)

အတွေ့အကြုံရင့် အထူးကုဆရာဝန် ၉၀ ကျော်ဖြင့် လည်ပတ်ဆောင်ရွက်နေသော တယ်လီကျန်းမာ၏ အထူးကုဆေးခန်း ၂၅ ခုကျော်သည် နေ့စဥ် နံနက် ၈ နာရီမှ ည ၁၀ အထိ ဝန်ဆောင်မှုပေးလျက်ရှိသည်။ ဤအထူးကုဆေးခန်းများသည် နေ့စဉ် လူနာ ၂၀ ကျော်ကို ဝန်ဆောင်မှုပေးနေပြီး စိတ်ရောဂါအထူးကု၊ အရေပြားအထူးကု၊ အထွေထွေဆေးပညာနှင့် သားဖွားမီးယပ် အထူးကုဆေးခန်းများတွင် လူနာအများဆုံး လာရောက်ပြသလျက် ရှိပါသည်။

တယ်လီကျန်းမာ၏ ကနဦး လူနာဝန်ဆောင်မှုဌာန (Customer Service Team)

တယ်လီကျန်းမာ၏ ကနဦး လူနာဝန်ဆောင်မှုဌာန (Customer Service Team) တွင် စေတနာ့ဝန်ထမ်း ၄၀ ကျော် ပါဝင်ပြီး Facebook Messenger နှင့် Telegram မှတစ်ဆင့် ဆက်သွယ်လာသူများကို အွန်လိုင်းဆေးဝါးကုသမှုဆိုင်ရာ ဝန်ဆောင်မှုများ ရယူနိုင်ရန်အတွက် ကူညီလမ်းညွှန်ပေးပါသည်။ ထို့ပြင် ဤဌာနသည် ကျန်းမာရေးနှင့်ပတ်သက်သည့် မေးမြန်းမှုများကို မှန်ကန်သော အချက်အလက်များဖြင့် ဖြေကြားပေးခြင်းဖြင့်လည်း ကျန်းမာရေးအသိပညာပေးခြင်းကို အထောက်အကူပြုလျက် ရှိပါသည်။ ဤဌာနသည် မြန်မာနိုင်ငံတစ်ဝန်းနှင့် ကမ္ဘာအနှံ့ရှိ မြန်မာလူမျိုးများကို ဝန်ဆောင်မှုပေးနေပြီး နေ့စဥ် နံနက် ၈ နာရီမှ ည ၁၀ နာရီအထိ လည်ပတ်ဆောင်ရွက်လျက် ရှိပါသည်။

မိမိကိုယ်ကိုယ် သေကြောင်းကြံစည်မှု ကာကွယ်တားဆီးရေး အရေးပေါ်ဝန်ဆောင်မှု ဟော့လိုင်းချန်နယ် (Zero Suicide Hotline)

မိမိကိုယ်ကိုယ် သေကြောင်းကြံစည်မှု ကာကွယ်တားဆီးရေး အရေးပေါ်ဝန်ဆောင်မှု ဟော့လိုင်းချန်နယ် (Zero Suicide Hotline) သည် မိမိကိုယ်ကိုယ် သေကြောင်းကြံစည်ခြင်းများကို ကာကွယ်ရန်အတွက် ဟော့လိုင်းမှတစ်ဆင့် ဆောင်ရွက်နေသော အစီအစဉ်တစ်ခု ဖြစ်ပါသည်။ ဤအစီအစဥ်တွင် ပါဝင်ကူညီပေးနေသော စေတနာ့ဝန်ထမ်းများသည် လူနာ၏ ရင်ဖွင့်ပြောစကားများကို ဂရုတစိုက် နားလည်မှုရှိစွာ နားထောင်ပေးခြင်း၊ စိတ်ပိုင်းဆိုင်ရာနှင့် လူမှုရေးဆိုင်ရာ အထောက်အပံ့များပေးခြင်းအပြင် လိုအပ်ပါက တယ်လီကျန်းမာရှိ သင့်တော်သော စိတ်ကျန်းမာရေးဆိုင်ရာဆေးခန်းများ (ဥပမာ - စိတ်ရောဂါအထူးကု ဆရာဝန်၏ ဆေးခန်း) သို့ လွှဲပြောင်းပေးခြင်းများ ဆောင်ရွက်ပါသည်။ ဤဟော့လိုင်းချန်နယ်တွင် စေတနာ့ဝန်ထမ်း ၃၅ ဦးကျော်နှင့် စီမံကြီးကြပ်သူ စိတ်ကျန်းမာရေးအထူးကုဆရာဝန် ၆ ဦး ပါဝင်ပြီး Telegram မှတစ်ဆင့် နေ့စဉ် ဝန်ဆောင်မှုပေးလျက် ရှိပါသည်။

အခြေခံ စိတ်ကျန်းမာရေးဆေးခန်းများ (Primary Mental Health Clinics)

အခြေခံ စိတ်ကျန်းမာရေးဆေးခန်းများကို စနစ်တကျ လေ့ကျင့်သင်ကြားထားသော ကျွမ်းကျင်ဆရာဝန်များဖြင့် လည်ပတ်ဆောင်ရွက်နေပြီး အခြေခံစိတ်ကျန်းမာရေး ဝန်ဆောင်မှုများဖြစ်သည့် ကနဦး စိတ်ကျန်းမာရေး အကဲဖြတ်မှုများ၊ အကြံပေးမှုများ (counselling)၊ ဖြစ်ပွားတတ်သော စိတ်ကျန်းမာရေး အခြေအနေများအတွက် ကုသမှုပေးခြင်းနှင့် စိတ်ရောဂါအထူးကုများထံ လွှဲပြောင်းပေးခြင်းတို့ကို ဆောင်ရွက်ပေးပါသည်။ ဤဆေးခန်းများတွင် စေတနာ့ဝန်ထမ်း အခြေခံစိတ်ကျန်းမာရေး ကျွမ်းကျင်ဆရာဝန် ၃၀ ကျော်ဖြင့် လည်ပတ်ဆောင်ရွက်နေပါသည်။

ကျန်းမာရေး အသိပညာမြှင့်တင်ရေး ဝန်ဆောင်မှုများ (Health Promotion Services)

ကျန်းမာရေး အသိပညာမြှင့်တင်ရေးအဖွဲ့တွင် စာမူရေးသား ဖန်တီးသူများ (content creators)၊ တည်းဖြတ်သူများ၊ ဒီဇိုင်နာများနှင့် တိုင်းရင်းသား သို့မဟုတ် ဒေသခံ ဘာသာစကား ကျွမ်းကျင်သူများ ပါဝင်သည်။ ကျန်းမာရေး အသိပညာမြှင့်တင်ရေး အဖွဲ့သည် တယ်လီကျန်းမာ၏ Facebook၊ YouTube၊ Website၊ Telegram နှင့် Instagram ချန်နယ်များမှတစ်ဆင့် ကျန်းမာရေးပညာပေး အစီအစဉ်များနှင့် ဗီဒီယိုများကို အတူတကွ ပူးပေါင်းတင်ဆက်လျက် ရှိပါသည်။ ဤအဖွဲ့တွင် အကြောင်းအရာ ထုတ်လုပ်မှု နယ်ပယ်အသီးသီးမှ ကျွမ်းကျင်သူ စေတနာ့ဝန်ထမ်း ၂၇ ဦး ပါဝင်ပြီး လစဥ် Facebook စာမျက်နှာတွင် ပညာပေးအကြောင်းအရာ ၁၅၀ ကျော်နှင့် Youtube channel တွင် ပညာပေးဗီဒီယို ၄ ခုခန့် တင်ဆက်ပေးလျက်ရှိပါသည်။ ထို့အပြင် ကျန်းမာရေး ပညာပေးပို့စ်များကိုလည်း တယ်လီကျန်းမာ၏ ဝက်ဘ်ဆိုဒ်တွင် စနစ်တကျ ပြန်လည်စီစဉ် ဖော်ပြထားရှိပါသည်။

ဝန်ထမ်းများ၏ စွမ်းဆောင်ရည် ဖွံ့ဖြိုးတိုးတက်ရေးနှင့် စဥ်ဆက်မပြတ် ဆေးပညာသင်ကြားလေ့လာမှု အစီအစဥ်များ (Capacity Development and Continued Medical Education)

တယ်လီကျန်းမာ၏ အရည်အသွေး ထိန်းသိမ်းမြှင့်တင်မှုနှင့် စီမံပံ့ပိုးမှုအဖွဲ့ (Quality Assurance and Program Support Team) သည် ဝန်ဆောင်မှုအရည်အသွေးများနှင့် ထိရောက်မှုများကို စောင့်ကြည့်ထိန်းညှိခြင်း၊ ကုသမှုစံနှုန်းများကို ကြီးကြပ်ခြင်း၊ အစီအစဉ် အကောင်အထည်ဖော်မှုများကို ပံ့ပိုးပေးခြင်းအပြင် အွန်လိုင်းဆေးခန်းများ ထိရောက်စွာ လည်ပတ်စေနိုင်ရေးအတွက်လည်း တာဝန်ယူဆောင်ရွက်ပေးလျက် ရှိပါသည်။ ဤအဖွဲ့သည် တယ်လီကျန်းမာ စေတနာ့ဝန်ထမ်းများ၏ ဆေးပညာကျွမ်းကျင်မှုများကို ပိုမိုဖွံ့ဖြိုးတိုးတက်စေရန်အတွက် ပြည်ပရောက် ပညာရှင်များနှင့် အထူးကုများ၏ အကူအညီဖြင့် စဥ်ဆက်မပြတ် ဆေးပညာသင်ကြားလေ့လာမှု သင်တန်းများ ပုံမှန်စီစဉ်ပေးလျက်ရှိသည့်အပြင် ဝန်ဆောင်မှုအရည်အသွေးကို မြှင့်တင်ရန်အတွက် ဌာနတွင်းဆိုင်ရာ စစ်ဆေးမှုများ၊ လူနာစိတ်ကျေနပ်မှု စစ်တမ်းများနှင့် လူထု၏ တုံ့ပြန်အကြံပြုချက်ရယူခြင်းလုပ်ငန်းများကိုလည်း ဆောင်ရွက်လျက် ရှိနေပါသည်။

ဦးတည်ချက်များ

မြန်မာပြည်သူလူထုအား ကျန်းမာရေး၀န်ဆောင်မှုများနှင့် ကျန်းမာရေးအသိပညာများပေးနိုင်ရန်

ဖက်ဒရယ်စနစ်သို့ ဦးတည်သော ကျန်းမာရေးစနစ်တစ်ခု တည်ထောင်နိုင်ရန်

အကြမ်းမဖက်အာဏာဖီဆန်လှုပ်ရှားမှုတွင်ပါ၀င်သော ကျန်းမာရေး၀န်ထမ်းများနှင့် စေတနာ့၀န်ထမ်းများကို တစ်ဖက်တစ်လမ်းမှ ပံ့ပိုးပေးစေနိုင်ရန်၊ ဆေးပညာအသီးအပွင့်များဆက်လက် ပွားများစေရန် ရည်ရွယ်ပါသည်။

အရေးပါသော လုပ်ဆောင်ချက်များ

ဆွေးနွေးတိုင်ပင်မှုများ – မတ်လ ၂၀၂၃ ထိ လူနာများအား ၁၁၅,၃၉၉ ကြိမ် ဆွေးနွေးကုသပေးနိုင်ခဲ့ပါတယ်။
တယ်လီကျန်းမာ မှ အသိပညာဖြန့်၀ေခြင်းကို Facebook Page မှတစ်ဆင့် ကြည့်ရှုသူ (၁၀) သန်းခန့် ကို ဆန်းသစ်သော ပုံစံများဖြင့် မျှဝေနိုင်ခဲ့ပါတယ်။
သုတေသန စာတမ်း – စိတ်ကျန်းမာရေး၀န်ဆောင်မှုနှင့် ပတ်သက် သော သုတေသန ပိုစတာကို APA conference 2023တွင် တင်ပြနိုင်ခဲ့ပါတယ်။

လူနာများ

မြန်မာနိုင်ငံ အနှံ့အပြားတွင် ရှိသော (၃၁၉) မြို့နယ်မှ လူထုများ လာရောက်ဆက်သွယ်ခဲ့ကြပါတယ်။ ကမ္ဘာအနှံ့ (၃၁) နိုင်ငံမှ နိုင်ငံရပ်ခြားတွင် ရောက်ရှိနေသောမြန်မာများကိုလည်း ဆွေးနွေးတိုင်ပင်မှုပေးခဲ့ပါသည်

တယ်လီကျန်းမာ၏ အရည်အသွေး ထိန်းသိမ်းမြှင့်တင်မှုနှင့် စီမံပံ့ပိုးမှုအဖွဲ့ (Quality Assurance and Program Support Team) သည် ဝန်ဆောင်မှုအရည်အသွေးများနှင့် ထိရောက်မှုများကို စောင့်ကြည့်ထိန်းညှိခြင်း၊ ကုသမှုစံနှုန်းများကို ကြီးကြပ်ခြင်း၊ အစီအစဉ် အကောင်အထည်ဖော်မှုများကို ပံ့ပိုးပေးခြင်းအပြင် အွန်လိုင်းဆေးခန်းများ ထိရောက်စွာ လည်ပတ်စေနိုင်ရေးအတွက်လည်း တာဝန်ယူဆောင်ရွက်ပေးလျက် ရှိပါသည်။ ဤအဖွဲ့သည် တယ်လီကျန်းမာ စေတနာ့ဝန်ထမ်းများ၏ ဆေးပညာကျွမ်းကျင်မှုများကို ပိုမိုဖွံ့ဖြိုးတိုးတက်စေရန်အတွက် ပြည်ပရောက် ပညာရှင်များနှင့် အထူးကုများ၏ အကူအညီဖြင့် စဥ်ဆက်မပြတ် ဆေးပညာသင်ကြားလေ့လာမှု သင်တန်းများ ပုံမှန်စီစဉ်ပေးလျက်ရှိသည့်အပြင် ဝန်ဆောင်မှုအရည်အသွေးကို မြှင့်တင်ရန်အတွက် ဌာနတွင်းဆိုင်ရာ စစ်ဆေးမှုများ၊ လူနာစိတ်ကျေနပ်မှု စစ်တမ်းများနှင့် လူထု၏ တုံ့ပြန်အကြံပြုချက်ရယူခြင်းလုပ်ငန်းများကိုလည်း ဆောင်ရွက်လျက် ရှိနေပါသည်။

Our Timeline

၁၉ ဇွန် ၂၀၂၁

တယ်လီကျန်းမာ အွန်လိုင်းဆေးခန်းစတင်

၂၆ ဇွန် ၂၀၂၁

အထူးကုဆေးခန်း ၆ ခု စတင်

၁၆ ဇူလိုင် ၂၀၂၁

ကိုဗစ်သံသယလူနာ ၆၅၀၀၀ ခန့်ကို ကြည်ရှု့ပေးခဲ့

၂၄ ဇူလိုင် ၂၀၂၁

ကိုဗစ်-၁၉ CDM ချန်နယ် စတင် (စေတနာ့ဝန်ထမ်း ၄၅၀ ကျော်ဖြင့်)

၅ သြဂုတ် ၂၀၂၁

တန်းစီဆေးခန်း စတင်

၁၃ သြဂုတ်လ ၂၀၂၂

အခြေခံ စိတ်ကျန်းမာရေးဆေးခန်း စတင်

၁ နိုဝင်ဘာ ၂၀၂၂

ကျန်းမာရေးစောင့်ရှောက်မှု ပေးခဲ့သော အကြိမ်ရေ ၁၀၀,၀၀၀ သို့ ရောက်ရှိ

၃ နိုဝင်ဘာ ၂၀၂၂

တယ်လီကျန်းမာ YouTube Channel စတင်

၃၁ ဒီဇင်ဘာ ၂၀၂၂

ကျန်းမာရေးအသိပညာပေးစာ ပို့စ် ၅၀၀ကျော် တင်နိုင်ခဲ့

၂၀ နိုဝင်ဘာ ၂၀၂၂

တိုင်းရင်းသား ဘာသာစကားများဖြင့် ကျန်းမာရေးပညာပေးပိုစ့်များ စတင်

၂၃ မတ် ၂၀၂၃

Facebook Page Follower ၄၀၀,၀၀၀ ကျော်သို့ ရောက်ရှိခဲ့

ယခုအချိန်ထိ

အထူးကုဆေးခန်း ၂၅ခုထိ ရှိနေ

မီနူး

တယ်လီကျန်းမာ

တယ်လီကျန်းမာ