ကိုယ့်ကိုယ်ကထွက်တဲ့ ကိုယ်နံ့ဆိုးတဲ့အခါ ကိုယ်တိုင်စိတ်ရှုပ်ရတဲ့အပြင် လူအများကြား အခြားသူတွေကို အနံ့ဆိုးကြောင့် အားနာရတာ၊ ရှက်စရာလို့တွေးနေမိတတ်တာ၊ နောက် စိတ်မလုံခြုံဘဲ တစ်ချိန်လုံး ဒီအပေါ်ပဲစိတ်ရောက် အလုပ်မတွင်ဘဲ စိတ်နောက်စရာပါ။
ကိုယ်နံ့ဆိုးစေတဲ့ အကြောင်းတရားတွေကတော့
– တစ်ကိုယ်ရေသန့်ရှင်းရေး အားနည်းလို့
– စနစ်တကျသန့်ရှင်းရေးမလုပ်မိလို့
– ချွေးထွက်များလို့
( ချွေးထွက်များတဲ့အခါ အရေပြားပေါ်က ဘတ်တီးရီးယားပိုးမွှားတွေ ပွားများပြီး အနံဆိုးထွက်စေပါတယ်။ အထူးသဖြင့် ချိုင်း၊ ပေါင်ခြံလိုနေရာတွေပေါ့ )
– ဒါမှမဟုတ် ရောဂါအခံတွေကြောင့် အနံဆိုးထွက်စေတတ်ပါသေးတယ်
( ဥပမာ- မိန်းမကိုယ်ပိုးဝင်ရောင်းရမ်းရောဂါ၊ ကျောက်ကပ်ပျက်စီးရောဂါ (Kidney failure) အသည်းရောဂါများ စသည်… )
– မှတ်သားစရာ တစ်ခုက ဆေးခြောက် (Marijuana) သောက်ရင်လည်း ကိုယ်နံ့ဆိုးစေပါတယ်….
ကိုယ်နံ့ဆိုးထွက်တာလျော့အောင် ဘာလုပ်ရမလဲ ?
ရေချိုးတဲ့အခါ ကိုယ်အရေပြားကို ဆပ်ပြာအသုံးပြု သေချာပွတ်တိုက် သန့်စင်ပေးပါ။ အထူးသဖြင့် အနံဆိုးထွက်တတ်တဲ့ ချိုင်း၊ ပေါင်ခြံ၊ ခြေဖဝါးလိုနေရာတွေကို ဂရုပြုသန့်ရှင်းရေးလုပ်ပေးပါ
မနက်တစ်ခါ ညတစ်ခါ ရေချိုးသန့်စင်ပေးနိုင်ရင်အကောင်းဆုံးပဲ…. အကြောင်းရင်းကတော့ ဒီအချိန်တွေမှာ ကိုယ့်အရေပြားပေါ်က ချွေးထုတ်ဂလင်းတွေနဲ့ အနံ့ဆိုးထွက်စေတဲ့ ဘတ်တီးရီးယားတွေ နိုးကြား active ဖြစ်ကြတာကြောင့်လို့ ဆိုပါတယ်။
ပုံမှန်ဆပ်ပြာနဲ့မှ မရရင် ပိုးသေဆေးပါတဲ့ Antibacterial soap တွေအသုံးပြုပါ။
Ready made အဝတ်အထည်တွေအစား ကိုယ်နဲ့ သင့်တော်မယ့်၊ ရာသီဥတုနဲ့လိုက်လျောညီထွေဖြစ်စေမယ့် လေဝင်လေထွက်ကောင်းစေတဲ့ ချည်ထည်၊ သိုးမွေးထည်တွေကို ရွေးချယ်ဝတ်ဆင်ပါ။
အဝတ်ပုံမှန်လျှော်ပါ
အတွင်းဝတ်တွေကို နေ့စဥ်လဲပါ
ကိုယ့်အဝတ်အစားကလေးတွေကို သန့်ရှင်းခြောက်သွေ့နေပါစေ…
ကိုယ်နဲ့သင့်တော်ကိုက်ညီမယ့် အနံ့အသက်ပျောက်ဆေး၊ ချွေးနံ့ပျောက်ဆေးရွေးချယ်အသုံးပြုပါ။
ကိုယ်နံ့ဆိုးစေတဲ့ ကြက်သွန်ဖြူ၊ ကြက်သွန်နီ၊ ငါး၊ ကညွန့် စတာတွေစားတာ လျှော့ပါ
ကဖင်းဓာတ်ပါတဲ့ အစားအသောက်တွေက ချွေးထွက် များစေတတ်လို့ လက်ဖက်ရည်၊ ကော်ဖီ၊ ကိုလာ စတာတွေလျှော့ပါ
တကယ်လို့ ကိုယ့်ခြေထောက်က ချွေးထွက် များတတ်၊ အနံ့ဆိုးထွက်တတ်တယ်ဆို ခြေအိတ်ပုံမှန်လဲလှယ်… ဂရုပြုသန့်ရှင်းပေးပါ။
ချိုင်းအောက်က အမွှေးအမျှင်တွေကို ပုံမှန်ရိတ်ပေးပါ
နောက်ဆုံးအနေနဲ့ ချိုင်းက ချွေးထုတ်ဂလင်းတွေကို ခွဲစိတ်ဖယ်ရှားပစ်တာကလည်း နည်းလမ်းတစ်ခုပါပဲလို့ ဖော်ပြပေးရင်း
” အားလုံးပဲ ကိုယ်နံ့ဆိုးခြင်း ကင်းဝေးကြပါစေ “
Reference 
Murtagh,J , 2016. Murtagh’s patient education. 6th Ed. Australia:Mcgraw-Hill Australia,pp.234
NUG, MOH တယ်လီကျန်းမာ ၊ လူတိုင်းအတွက်ပါ
တယ်လီကျန်းမာတွင် ဆရာဝန်များနှင့် အွန်လိုင်းမှ အခမဲ့တိုင်ပင်ဆွေးနွေးနိုင်ပါသည်
*** ပိတ်ရက်မရှိပါ ***
ကြိုတင်ဘိုကင်ယူရန်အတွက်( https://m.me/telehealthmm )ကို နှိပ်ပါ
( နေ့စဉ် မနက် ၈နာရီမှ ည၁၀နာရီအထိ )
Ministry of Health,
National Unity Government.
#nugmoh#telehealth#telemedicine
#teleconsultation#တယ်လီကျန်းမာ
#ကိုယ်နံ့ဆိုး#ကိုယ်ခန္ဓာအနံ့ဆိုးထွက်ခြင်း#bodyodour
Published on: 22 November 2022
Last Updated: 22 November 2022